பாஜகவில் இணைகின்றனரா கமல்நாத், நகுல்நாத்?
மத்தியப் பிரதேச முன்னாள் முதலமைச்சர் கமல்நாத் அவரது மகன் நகுல்நாத் எம்.பியுடன் காங்கிரஸ் கட்சியில் இருந்து விலகி பாஜகவில் இணைய உள்ளதாக தகவல் வெளியாகியுள்ளது.
ஆனால், காங்கிரஸ் கட்சியில் இருந்தும் பலர் விலகி வருகின்றனர். கடந்த பிப்.12-ம் தேதி காங்கிரஸ் கட்சியின் மூத்த தலைவரான அசோக் சவான் அக்கட்சியில் இருந்து விலகி பாஜகவில் சேர்ந்தார். தற்போது மாநிலங்களவை உறுப்பினராக போட்டியிட அவருக்கு பாஜக வாய்ப்பளித்துள்ளது. இந்நிலையில் காங்கிரஸ் கட்சியின் மூத்த தலைவரும், மத்தியப்பிரதேச முன்னாள் முதலமைச்சருமான கமல்நாத் தனது மகன் நகுல்நாத் எம்.பி.யுடன் பாஜகவில் இணையவுள்ளதாக என்று தகவல் வெளியாகியுள்ளது.
தேர்தலுக்கு முன்பாக இவர்கள் இருவரும் பாஜகவில் சேரலாம் என தகவல்கள் தெரிவிக்கின்றன. ஆனால் இதுகுறித்து அதிகாரப்பூர்வ தகவல்கள் எதுவும் வெளியிடப்படவில்லை. இதனைத்தொடர்ந்து, பாஜக செய்தித் தொடர்பாளரும், கமல்நாத்தின் முன்னாள் ஊடக ஆலோசகருமான நரேந்திர சலுஜா, கமல்நாத் மற்றும் அவரது மகன் நகுல் நாத் புகைப்படத்தை வெளியிட்டு, அதற்கு "ஜெய் ஸ்ரீராம்" என்று தலைப்பிட்டுள்ளார்.
இதற்கிடையில், காங்கிரஸ் எம்.பி.யான நகுல் நாத், தனது அதிகாரப்பூர்வ, எக்ஸ் பக்கத்தில் தனது சுயவிவர குறிப்பில் இருந்து காங்கிரஸ் கட்சியை நீக்கியுள்ளார் என்பது குறிப்பிடத்தக்கது.
