"நிதிஷ் குமாரை தொடர்ந்து கெஜ்ரிவாலும் வெளியேறுவார்" - திரிபுரா முன்னாள் முதலமைச்சர் பேட்டி.!

"நிதிஷ் குமாரை தொடர்ந்து கெஜ்ரிவாலும் வெளியேறுவார்" - திரிபுரா முன்னாள் முதலமைச்சர்  பிப்லப் குமார் தேவ் தெரிவித்துள்ளார்.

பாட்னாவில் உள்ள ஆளுநர் மாளிகைக்கு இன்று காலை சென்ற பீகார் முதலமைச்சர் நிதிஷ் குமார், ஆளுநர் ராஜேந்திர அர்லேகரைச் சந்தித்து ராஜினாமா கடிதத்தைக் கொடுத்தார். பின்னர் ஆளுநர் மாளிகைக்கு வெளியே செய்தியாளர்களிடம் பேசிய அவர், “பீகார் முதலமைச்சர் பதவியை இன்று நான் ராஜினாமா செய்துவிட்டேன். அமைச்சரவையை கலைக்கவும் ஆளுநரிடம் பரிந்துரைத்துள்ளேன். இந்தியா கூட்டணியில் விஷயங்கள் சரியாக நடக்கவில்லை. நான் காயப்படுத்தப்பட்டேன். எனவே, இந்தியா கூட்டணியை விட்டு நான் வெளியேறிவிட்டேன்” என தெரிவித்தார்.

இந்த நிலையில் தமிழ்நாடு வந்திருந்த திரிபுரா முன்னாள் முதலமைச்சரும் பாஜக தலைவருமான பிப்லப்குமார் தேவ் கமலாலயத்தில் செய்தியாளர்களிடம் தெரிவித்ததாவது..

பிகார் மாநிலத்தில் தற்போது நடைபெறுவது வெறும் டிரைலர்தான். ஒரு வாரத்தில் டெல்லி முதல்வர் கேஜ்ரிவாலும் இந்தியா கூட்டணியில் இருந்து வெளியேறுவார்.  மம்தா பானர்ஜி, லாலு பிரசாத் யாதவ் , அகிலேஷ் யாதவ்,  மு.க.ஸ்டாலின் ஆகியோர் ஒருங்கிணைந்த  கூட்டணி இந்தியா கூட்டணி அல்ல, குடும்ப கூட்டணி. நிதிஷ்குமாரை தொடர்ந்து டெல்லி முதல்வர் கேஜ்ரிவாலும் ஒரு வாரத்தில் இந்தியா கூட்டணியில் இருந்து வெளியேறுவார் “  என பிப்லப்குமார் தெரிவித்தார்.