2025 டெல்லி சட்டமன்றத் தேர்தல் தேதிகள் அறிவிக்கப்பட்ட நிலையில், சமூக ஊடகங்களில் ஒரு படம் வைரலாகி வருகிறது. இந்தப் படத்தில், டெல்லியில் உள்ள திகார் மத்திய சிறைச்சாலையின் வாயிலுக்கு வெளியே 'கெஜ்ரிவால் வருவார்' என்று எழுதப்பட்ட ஒரு பதாகை வைக்கப்பட்டுள்ளது.
ஆம் ஆத்மி கட்சியின் (AAP) ஒருங்கிணைப்பாளரும் டெல்லி முன்னாள் முதலமைச்சருமான அரவிந்த் கெஜ்ரிவாலை விமர்சிக்கும் வகையில் பயனர்கள் இந்தப் புகைப்படத்தைப் பகிர்ந்து வருகின்றனர்.
வைரலாகும் புகைப்படம் எடிட் செய்யப்பட்டதாக கண்டறியப்பட்டது. திகார் சிறையின் அசல் புகைப்படத்துடன் கெஜ்ரிவாலின் பேனர் தனித்தனியாக சேர்க்கப்பட்டுள்ளது. கெஜ்ரிவாலின் இந்த பேனரின் படத்தை ஆம் ஆத்மி கட்சியின் அதிகாரப்பூர்வ இன்ஸ்டாகிராமில் காணலாம்.
டெல்லியின் 70 சட்டமன்றத் தொகுதிகளுக்கும் வாக்குப்பதிவு நாளை (பிப். 5) நடைபெறவுள்ளது. அதன் முடிவுகள் பிப்ரவரி 8, 2025 அன்று அறிவிக்கப்படவுள்ளன.
மதுபான ஊழல் வழக்கில் அரவிந்த் கெஜ்ரிவால் மார்ச் 21, 2024 அன்று கைது செய்யப்பட்டார். விசாரணைக்குப் பிறகு, ஏப்ரல் 1 அன்று அவர் திகார் சிறைக்கு அனுப்பப்பட்டார். சுமார் 156 நாட்களுக்குப் பிறகு, செப்டம்பர் 13, 2024 அன்று அவருக்கு ஜாமீன் கிடைத்தது. இந்தச் சூழலில் பயனர்கள் வைரலாகும் படத்தைப் பகிர்ந்து வருகின்றனர்.
இந்தப் படத்தை ஃபேஸ்புக்கில் பகிர்ந்து, ஒரு பயனர், “திகார் சிறைக்கு வெளியே ஒரு பேனர் தொங்குகிறது. அதில் - கெஜ்ரிவால் மீண்டும் வருவார்” என்று எழுதப்பட்டுள்ளது.
பதிவின் காப்பக இணைப்பு.
உண்மை சரிபார்ப்பு:
வைரலான படத்தைப் பார்த்தபோது, அங்கு எந்த விளம்பரப் பலகை இல்லை என்பது தெரியவந்தது. கெஜ்ரிவாலின் பேனரின் படம் தனியாக ஒட்டப்பட்டுள்ளது.
அந்தப் புகைப்படத்தை ரிவர்ஸ் இமேஜ் தேடலில் மேற்கொண்டபோது, திகார் சிறை தொடர்பான செய்திகளில், கோப்புப் புகைப்படமாகப் பயன்படுத்தப்படும் பல செய்தி அறிக்கைகள் கிடைத்தன. அறிக்கைகளை இங்கே, இங்கே, இங்கே மற்றும் இங்கே காணலாம்.
இந்தியா டிவியின் அறிக்கையில், அசல் புகைப்படம் பிரஸ் டிரஸ்ட் ஆஃப் இந்தியா (PTI)-விற்கு சொந்தம் என தெரிவித்திருந்தது. வைரலாகும் படத்தில் காணப்படும் தடுப்புச் சுவர் அசல் புகைப்படங்களிலும் உள்ளது.
'கெஜ்ரிவால் ஆயேங்கே' பேனர் ரிவர்ஸ் இமேஜ் தேடலிலும் கிடைத்தது. இதன் மூலம், ஆம் ஆத்மி கட்சியின் அதிகாரப்பூர்வ இன்ஸ்டாகிராமில் படம் கிடத்தது. வைரலான படத்தைப் போலவே, இந்தப் பேனரிலும் மடிப்புகள் இருப்பதை தெளிவாகக் காணலாம்.
ஆகஸ்ட் 2024 இல் டெல்லி தேர்தலை முன்னிட்டு ஆம் ஆத்மி கட்சி 'கெஜ்ரிவால் ஆயேங்கே' பிரச்சாரத்தைத் தொடங்கியது. இதன் கீழ், இந்த சுவரொட்டிகள் நகரின் பல்வேறு இடங்களில் ஒட்டப்பட்டன. வைரலான படத்துடன் கூடிய சுவரொட்டி டெல்லியில் உள்ள தீன்தயாள் உபாத்யாய் மார்க்கில் ஒட்டப்பட்டது.
இதிலிருந்து இந்த வைரல் படம் இந்த 2 வெவ்வேறு படங்களை இணைத்து எடிட் செய்யப்பட்டுள்ளது என்பது தெளிவாகிறது. வரவிருக்கும் சட்டமன்றத் தேர்தலைக் கருத்தில் கொண்டு இது போலியான முறையில் பிரச்சாரம் செய்யப்பட்டு பரப்பப்படுகிறது.
Note : This story was originally published by ‘Boom’ and Translated by ‘News7 Tamil’ as part of the Shakti Collective.
