தனிநபர் கல்வி ஆவணங்கள் பொதுத் தகவல் அல்ல - ஸ்மிருதி இரானி வழக்கில் டெல்லி உயர்நீதிமன்றம் தீர்ப்பு!

2014 முதல் 2024 வரை பிரதமர் நரேந்திர மோடி தலைமையிலான அமைச்சரவையில் பல்வேறு துறைகளின் மத்திய அமைச்சராகப் பதவி வகித்தவர் ஸ்மிருதி இரானி. இவரது கல்வித் தகுதி குறித்து பல்வேறு சர்ச்சைகள் அவ்வப்போது எழுந்து வந்தன. குறிப்பாக, இவரது தேர்தல் பிரமாணப் பத்திரங்களில் குறிப்பிடப்பட்டுள்ள கல்வித் தகவல்கள் மாறுபட்டு இருந்ததாக குற்றச்சாட்டுகள் எழுந்தன.

இந்த பின்னணியில், இவரது 10 மற்றும் 12 ஆம் வகுப்பு கல்விச் சான்றிதழ்கள் குறித்த தகவல்களைத் தருமாறு தகவல் அறியும் உரிமைச் சட்டம் (RTI) மூலமாக விண்ணப்பம் ஒன்று தாக்கல் செய்யப்பட்டது. இந்த விண்ணப்பம், ஸ்மிருதி இரானி 1991 மற்றும் 1993 ஆம் ஆண்டுகளில் 10 மற்றும் 12 ஆம் வகுப்புத் தேர்வுகளில் தேர்ச்சி பெற்றாரா என்பதை உறுதிப்படுத்தக் கோரியது.

மத்திய தகவல் ஆணையம் (Central Information Commission - CIC), இந்த கோரிக்கையை ஏற்றுக்கொண்டு, சி.பி.எஸ்.இ நிர்வாகத்திடம் இருந்து ஸ்மிருதி இரானியின் கல்வி ஆவணங்களை வழங்குமாறு உத்தரவிட்டது. மத்திய தகவல் ஆணையத்தின் இந்த உத்தரவு, ஒரு தனிப்பட்ட நபரின் கல்வி விவரங்கள் பொதுவெளியில் பகிரப்படுமா என்ற கேள்வியை எழுப்பியது.

மத்திய தகவல் ஆணையத்தின் உத்தரவை எதிர்த்து, சி.பி.எஸ்.இ நிர்வாகம் 2017 ஆம் ஆண்டு டெல்லி உயர்நீதிமன்றத்தில் வழக்குத் தொடுத்தது. இந்த வழக்கில், ஒரு தனிநபரின் கல்வி விவரங்கள், மூன்றாம் தரப்பு தகவல் என்பதால், அதனை வெளிப்படையாக வெளியிடுவது தனிநபர் உரிமையை மீறும் செயல் என சி.பி.எஸ்.இ வாதிட்டது. இந்த வழக்கு பல ஆண்டுகளாக நடைபெற்று வந்தது.

இந்த வழக்கில் நீதிபதி சச்சின் தத்தா தலைமையிலான அமர்வு இன்று தீர்ப்பளித்தது. அந்தத் தீர்ப்பில், மத்திய தகவல் ஆணையத்தின் உத்தரவை ரத்து செய்வதாக நீதிபதி தெரிவித்தார்.ஒரு குறிப்பிட்ட நபரின் பட்டம், மதிப்பெண்கள், தேர்வு முடிவுகள் மற்றும் பொதுத் தகவல் உள்ளிட்டவற்றை நேரடியாக வழங்க முடியாது. இது உச்ச நீதிமன்றத்தின் முந்தைய தீர்ப்புகளை மீறக்கூடிய வகையில் அமையும் என நீதிபதி குறிப்பிட்டார்.

மேலும், ஒருவரது தனிப்பட்ட தகவலை வெளியிடும்போது, அது எந்த வகையில் பொதுநலனுக்கு முக்கியமானது என்பதை முதலில் ஆராய வேண்டும் என்றும், இந்த வழக்கில் அப்படி எந்த பொதுநலனும் இல்லை என்றும் நீதிபதி குறிப்பிட்டார்.மத்திய தகவல் ஆணையத்தின் அணுகுமுறை "முற்றிலும் தவறானது" என நீதிபதி கடுமையாகக் கருத்துத் தெரிவித்தார். தனிநபர் தகவல்களை வெளியிடுவதற்கு உச்ச நீதிமன்றம் வகுத்துள்ள வழிகாட்டுதல்களை மத்திய தகவல் ஆணையம் பின்பற்றவில்லை என்றும் அவர் சுட்டிக் காட்டினார்.

இந்தத் தீர்ப்பு, தனிநபர் தனியுரிமை மற்றும் தகவல் அறியும் உரிமைச் சட்டம் ஆகியவற்றுக்கு இடையேயான உறவு குறித்து ஒரு தெளிவான வழிகாட்டுதலை வழங்கியுள்ளது. இது எதிர்காலத்தில், தனிப்பட்ட தகவல்கள் கோரப்படும் பல வழக்குகளில் ஒரு முக்கியமான முன்மாதிரியாக அமையும். தனிநபர்களின் தகவல்கள், குறிப்பாக கல்வி, நிதி, மருத்துவ விவரங்கள் போன்றவற்றை பொதுவெளியில் வெளியிடுவதற்கு சில சட்டபூர்வமான வரம்புகள் உள்ளன என்பதை இத்தீர்ப்பு மீண்டும் உறுதிப்படுத்தியுள்ளது.