நயினார் நாகேந்திரன் வேண்டுகோள் - தமிழ் மண்ணின் மைந்தனுக்கு ஆதரவு தாருங்கள்!
இந்தியக் குடியரசுத் துணைத் தலைவர் தேர்தலில் தேசிய ஜனநாயகக் கூட்டணியின் வேட்பாளராக மகாராஷ்டிரா ஆளுநரும், தமிழ்நாட்டை சேர்ந்தவருமான சி.பி. ராதாகிருஷ்ணன் அறிவிக்கப்பட்டுள்ளார். இந்தச் சூழலில், மாநில பாஜக தலைவர் நயினார் நாகேந்திரன், தமிழ்நாட்டில் உள்ள 'இந்தியா' கூட்டணித் தலைவர்களுக்கு ஓர் அன்பான வேண்டுகோளை விடுத்துள்ளார்.
நயினார் நாகேந்திரன் தனது பதிவில், " தமிழ்நாட்டில் இருந்து ஒரு பலமான தேசியக்குரல் அதிகாரமிக்கதாக இருக்க வேண்டும்" எனத் தெரிவித்துள்ளார். தமிழ்நாட்டு மண்ணின் மைந்தர் ஒருவர் துணை குடியரசுத் தலைவர் வேட்பாளராகியிருப்பது ஒரு வரலாற்று சிறப்புமிக்க தருணம் என்றும் அவர் குறிப்பிட்டுள்ளார்.
இந்த வாய்ப்பை, அரசியல் வேறுபாடுகளைக் கடந்து, தமிழ்நாட்டிலுள்ள அனைத்து அரசியல் கட்சிகளும் ஆதரிக்க வேண்டும் என்று கேட்டுக்கொண்டுள்ளார். இது ஒரு ஆரோக்கியமான அரசியலை ஊக்குவிக்கும் என்றும், எதிர்கால வரலாற்றில் இது ஒரு சிறப்பான நிகழ்வாகப் பேசப்படும் என்றும் அவர் நம்பிக்கை தெரிவித்துள்ளார்.
"இந்தியா" கூட்டணியில் உள்ள கட்சிகளும் சி.பி. ராதாகிருஷ்ணனுக்கு ஆதரவு அளிப்பது சிறப்புக்குரியதாக இருக்கும் என நயினார் நாகேந்திரன் கூறியுள்ளார். கட்சி மற்றும் அரசியல் வேறுபாடுகளைக் களைந்து, தமிழ்நாட்டை சேர்ந்த அனைத்து நாடாளுமன்ற உறுப்பினர்களும் சி.பி. ராதாகிருஷ்ணன் அவர்களுக்கு ஆதரவு தருமாறு அவர் தனது பதிவில் அன்போடு கேட்டுக்கொண்டுள்ளார்.
மேலும் இந்த வேண்டுகோள், தேர்தல் அரசியலில் ஒரு புதிய அணுகுமுறையை முன்வைப்பதாகக் கருதப்படுகிறது. தமிழ்நாட்டில் உள்ள அனைத்துக் கட்சிகளின் ஆதரவையும் திரட்டி, சி.பி. ராதாகிருஷ்ணனின் வெற்றியை ஒருமித்த குரலில் கொண்டாட வேண்டும் என்பதே நயினார் நாகேந்திரனின் நோக்கமாகப் பார்க்கப்படுகிறது.
