காங். அறிவித்த ரூ.1 லட்சத்திற்காக வங்கி கணக்கு தொடங்க மக்கள் நீண்ட வரிசையில் காத்திருந்தனரா? உண்மை என்ன?

This news fact checked by Newsmeter

காங்கிரஸின் மகாலட்சுமி திட்டத்தின் கீழ், ரூ. 1 லட்சம் பெறுவதற்காக வங்கி கணக்கு தொடங்க, மக்கள் வெயிலில் வங்கி வாசலில் நிற்பது போல வைரலாகி வரும் வீடியோ உண்மை இல்லை என நிரூபணம் செய்யப்பட்டுள்ளது.

2024 மக்களவைத் தேர்தலுக்கான காங்கிரஸ் அறிக்கையின்படி, மகாலட்சுமி திட்டத்தின் கீழ் ஏழைக் குடும்பங்களைச் சேர்ந்த பெண்களின் வங்கி கணக்குகளுக்கு ஆண்டுக்கு ரூ.1 லட்சம் நிபந்தனையின்றி ரொக்கப் பரிமாற்றம் செய்யப்படும் என்று உறுதியளித்தது. தேர்தல் அறிக்கையில், “வறுமைக் கோட்டிற்கு கீழ் உள்ள குடும்பங்களில் ஏழைகள் அடையாளம் காணப்படுவார்கள்” என குறிப்பிடப்பட்டிருந்தது.

இதைத் தொடர்ந்து, காங்கிரஸ் தேர்தல் வாக்குறுதிகளை நிறைவேற்றுவதன் ஒரு பகுதியாக ரூ.8,500 பெறுவதற்காக மக்கள் வங்கிக் கணக்கு தொடங்க வரிசையில் நிற்பது போன்ற வீடியோ ஒன்று வைரலாகி வருகிறது.

ஃபேஸ்புக் பயனர் ஒருவர் வீடியோவைப் பகிர்ந்து, “இந்த 'கட்டா-கட்'க்கான வரியைப் பாருங்கள்? உங்களுக்கு கொஞ்சம் கூட வெட்கம் இல்லையா? இதைப் பற்றிக் கவனியுங்கள். இது ஒரு மோசடி என்று நீங்கள் நினைக்கவில்லையா? கொளுத்தும் வெயிலில், ஏழை மக்கள் ரூ.8,500 பெற வங்கி கணக்கைத் திறக்க வரிசையில் நிற்கிறார்கள் (இந்தியிலிருந்து மொழிபெயர்க்கப்பட்டது)” என தலைப்பிடப்பட்டிருந்தது.

காங்கிரஸ் தலைவர் ராகுல் காந்தி தனது பல தேர்தல் பிரசார உரைகளில், கட்சியின் வாக்குறுதிகள் மற்றும் திட்டங்களை விரைவாக செயல்படுத்துவதை விவரிக்கும் வகையில், வீடியோவைப் பகிரும் போது, ‘கட்டா கத்’ என்ற குறிச்சொல்லை மக்கள் பயன்படுத்துகின்றனர்.

உண்மை சரிபார்ப்பு:

இந்த வீடியோ 2020-ம் ஆண்டு வெளியானது என்பது கண்டறியப்பட்டது. எனவே, இந்த வீடியோவுடன் பகிரப்படும் கூற்று தவறானது என்று நியூஸ்மீட்டர் உறுதி செய்துள்ளது.

வீடியோவின் கீஃப்ரேமை தலைகீழ் படத் தேடல் செய்ததில், ஏப்ரல் 20, 2020 தேதியன்று நியூஸ் 18 யூடியூப் சேனலில் வெளியிடப்பட்ட வீடியோ ஒன்று கண்டறியப்பட்டது. அந்த வீடியோ, “முசாபர்நகரில் உள்ள ஒரு வங்கிக்கு வெளியே ஒரு கூட்டத்தின் வைரல் வீடியோ. வங்கி கணக்குகளில் இருந்து பணம் திரும்பப் பெறப்பட்டதாக வதந்தி பரவுகிறது.” என தலைப்பிடப்பட்டிருந்தது.

முசாஃபர்நகரில் (உத்தரப்பிரதேசம்) 5:14 நிமிட வீடியோவின்படி, “மக்கள் தங்கள் கணக்குகளில் இருந்து பணம் எடுக்கப்படுவதாக பரவிய வதந்தியால் வங்கியில் கூடினர். பலர் தங்கள் உள்ளூர் பாங்க் ஆஃப் பரோடா கிளைக்குச் சென்று தெளிவுபடுத்த வங்கிக்கு வந்து சேர்ந்தனர். வந்தவுடன், வங்கி ஊழியர்கள் சமூக விலகல் நடவடிக்கைகளை கடைபிடிக்குமாறு வாடிக்கையாளர்களை வலியுறுத்தினர். அவர்களின் பணம், குறிப்பாக அவர்களின் ஜன்தன் கணக்கில் டெபாசிட் செய்யப்பட்ட ரூ. 500 பாதுகாப்பானது என்றும், திரும்பப் பெறப்பட மாட்டாது என்றும் அவர்கள் அனைவருக்கும் உறுதியளித்தனர்” இவ்வாறு பதிவிடப்பட்டிருந்தது.

அந்த வீடியோவில், ஒருவர் ஊடகங்களிடம் பேசுவதைக் காணலாம். மோடிஜி வங்கிக் கணக்குகளுக்கு ரூ.500 வரவு வைத்தார். ஆனால் அது விரைவில் திரும்பப் பெறப்படும் என்ற செய்தியைக் கேட்டு நாங்கள் அனைவரும் இங்கு கூடினோம் என அவர் கூறுகிறார்.

மேலும் விசாரணையில், அரசாங்கம் வழங்கும் இலவச ரேஷனைப் பெறுவதற்காக முஸ்லிம் பெண்கள் காத்திருப்பதைக் காட்டுவதாக ஒரு தவறான கூற்றுடன் வீடியோ முன்பு புழக்கத்தில் இருந்தது. ஏப்ரல் 18, 2020 தேதியிட்ட உ.பி., முசாஃபர்நகரில் வங்கியின் முன் முஸ்லீம் பெண்களின் வரிசை என்ற தலைப்புடன் இது யூடியூபில் காணப்பட்டது.

முடிவு:

காங்கிரஸின் மகாலட்சுமி திட்டத்தின்கீழ், ரூ. 1 லட்சம் பெறுவதற்காக வங்கி கணக்கு தொடங்க, மக்கள் வெயிலில் வங்கி வாசலில் நிற்பது போல வைரலாகிவரும் வீடியோ உண்மை இல்லை என்பது கண்டறியப்பட்டுள்ளது.

Note : This story was originally published by Newsmeter and Translated by ‘News7 Tamil’ as part of the Shakti Collective.