“திமுகவினர் சிறுபான்மையினர்களை ஆதரிப்பவர்கள் அல்ல, சந்தர்ப்பவாதிகள்” - ராமநாதபுரத்தில் எடப்பாடி பழனிசாமி பரப்புரை!

1974-ல் மத்தியில் காங்கிரஸும் மாநிலத்தில் திமுகவும் இருந்தபோது மத்திய அரசு கச்சத்தீவை இலங்கைக்கு தாரைவார்த்தது. அப்போது தமிழ்நாட்டை ஆண்ட முதலமைச்சர் இதனை கண்டுகொள்ளவில்லை. கச்சத்தீவு ராமநாதபுரம் சமஸ்தானத்திற்கு சொந்தமானது. இதனால் மீனவ மக்கள் கடுமையாக பாதிக்கப்பட்டுள்ளனர். அத்துடன், இலங்கை கடற்படையால் தமிழக மீனவர்கள் கடும் பாதிப்புக்கு ஆளாகின்றனர்.

இந்நிலை மாற கச்சத்தீவை மீண்டும் பெற வேண்டும். அப்போது தான் மீனவர்களின் பிரச்னை தீரும். ஆரம்பத்தில் இருந்து இன்று வரை கச்சத்தீவை மீட்க தொடர்ந்து போராடி வரும் ஒரே கட்சி அதிமுக. 2014-ல் மத்தியில் பாஜக ஆட்சியின்போது கச்சத்தீவை இந்தியாவுடன் இணைக்க வேண்டும் என முன்னாள் முதலமைச்சர் ஜெயலலிதா கடிதம் எழுதினார். நேரில் சந்தித்தும் வலியுறுத்தினார். 10 ஆண்டுகளாக மீனவர்களின் துன்பங்களை வேடிக்கை பாஜக பார்த்துக்கொண்டிருந்தது. மீனவர்களின் வாக்கைப் பெற இப்போது கச்சத்தீவை பற்றி பாஜக பேசி வருகிறது.