மசோதாக்களுக்கு ஒப்புதல் அளிக்கும் காலக்கெடு - உச்சநீதிமன்றத்தில் விசாரணை!

மசோதாக்களுக்கு ஒப்புதல் அளிப்பதில் ஆளுநருக்கு காலக்கெடு நிர்ணயிப்பது குறித்த வழக்கு, உச்சநீதிமன்றத்தில் தலைமை நீதிபதி பி.ஆர்.கவாய், நீதிபதிகள் சூர்ய காந்த், விக்ரம்நாத், பி.எஸ்.நரசிம்மா, மற்றும் அதுல்.எஸ்.சந்துர்கர் ஆகியோர் அடங்கிய அரசியல் சாசன அமர்வில் நான்காவது நாளாக விசாரணைக்கு வந்தது. இந்த விசாரணையில், மத்திய அரசுக்கு ஆதரவாக மகாராஷ்டிரா அரசு தனது வாதங்களை முன்வைத்தது.

மகாராஷ்டிரா அரசின் சார்பில் ஆஜரான வழக்கறிஞர், இந்த விவகாரம் தொடர்பாக பல முக்கிய அம்சங்களை முன்வைத்தார்: நீதித்துறையின் மறுஆய்வு நடவடிக்கை என்பது அரசியலமைப்பின் அடிப்படையில் வரையறுக்கப்பட்டுள்ளது. நீதித்துறையின் மறுஆய்வு அதிகாரம் மறைமுகமானது என்றும், சில சமயங்களில் அது நடைமுறைக்கு ஒவ்வாததாகவும் இருக்கலாம் என்றும் வாதிடப்பட்டது. அரசியலமைப்பின் பிரிவு 201-ன் கீழ், ஒரு மாநில மசோதாவை மத்திய அரசு நிராகரிக்க அதிகாரம் உள்ளது. இந்த அதிகாரத்தை மத்திய அரசு பயன்படுத்தலாம் என மகாராஷ்டிரா அரசு குறிப்பிட்டது.

நீதிபதிகள், மத்திய மற்றும் மாநில சட்டங்களின் அதிகாரத்தை வரையறுக்கும் அரசியலமைப்பு பிரிவு 254-ன் நிலை என்ன என்று கேள்வி எழுப்பினர். இதற்கு பதிலளித்த மகாராஷ்டிரா தரப்பு,மாநில சட்டமன்றங்களுக்கும் சட்டம் இயற்றும் அதிகாரம் வழங்கப்பட்டுள்ளது.

ஆனால் மத்திய மற்றும் மாநில சட்டங்களை இரண்டு வெவ்வேறு பிரிவுகளாகப் பார்க்க வேண்டும்.அரசியலமைப்பின் விளக்கங்களை எப்போதும் ஒரே மாதிரியாக எடுத்துக் கொள்ளக் கூடாது. ஒவ்வொரு சூழ்நிலைக்கு ஏற்ப அதன் விளக்கம் மாறுபடும். பிரிவு 200-ஐ பிரிவு 254 (2)-உடன் சேர்த்துப் பார்த்தால், இரண்டு விதிகளுக்கும் இடையில் எந்த முரண்பாடும் இல்லை. பிரிவு 200-ஐ மட்டும் படித்தால் ஒரு குறிப்பிட்ட விளக்கம் கிடைக்கும், ஆனால் பிரிவு 254-உடன் சேர்த்துப் படிக்கும்போது அதன் விளக்கம் விரிவடையும்.விதிகளுக்கு வெளியே உள்ள வார்த்தைகளைச் சேர்த்து படிப்பதால்தான், மசோதாவுக்கு ஒப்புதல் அளிக்க ஒரு குறிப்பிட்ட காலக்கெடு இருப்பதாக மக்கள் உணர்கிறார்கள்.

ஆளுநரின் முடிவெடுக்கும் விவகாரத்தில், ஒரு மசோதாவுக்கு ஒப்புதல் மறுத்து நிறுத்தி வைக்கும் அதிகாரம் என்பது அந்த மசோதாவை சட்டமன்றத்துக்குத் திருப்பி அனுப்புவதற்கானது என்பதை உறுதிப்படுத்தும் வகையில் அரசியலமைப்பைத் திருத்தி எழுத வேண்டும் என்றும் மகாராஷ்டிரா அரசு வலியுறுத்தியது.

இந்த விவாதம், மாநில சுயாட்சி மற்றும் மத்திய-மாநில உறவுகளில் ஆளுநரின் பங்கு குறித்த சட்ட சிக்கல்களை மேலும் சிக்கலாக்குகிறது. இந்த வழக்கு விசாரணை தொடரும் என எதிர்பார்க்கப்படுகிறது.