“ஆளுநர் மீதான பாலியல் குற்றச்சாட்டு குறித்து பிரதமர் மோடி ஏன் பேசவில்லை?” - மேற்குவங்க முதலமைச்சர் மம்தா பானர்ஜி காட்டம்!

சந்தேஷ்காலி விவகாரத்தை பற்றி பேசிய பிரதமர் நரேந்திர மோடி, மேற்கு வங்க ஆளுநர் சி.வி.ஆனந்த போஸ் மீதான பாலியல் குற்றச்சாட்டுகள் குறித்து ஏன் பேசவில்லை என அம்மாநில முதலமைச்சர் மம்தா பானர்ஜி கேள்வி எழுப்பியுள்ளார்.

இந்நிலையில், பர்தாமானில் இன்று (மே. 3) நடைபெற்ற பேரணியில் உரையாற்றிய மம்தா பானர்ஜி,

“பிரதமர் மோடி சந்தேஷ்காலி குறித்து பல விஷயங்களை பேசியுள்ளார். நான் அங்கு எந்த அசம்பாவித சம்பவமும் நடக்கவிடவில்லை. நிலத்தை சுற்றி பிரச்னை இருந்தது. நாங்கள் அதிகாரிகளை கிராமத்திற்கு அனுப்பி தீர்த்தோம். ஆனால் ராஜ்பவனில் பணிபுரியும் ஒரு இளம்பெண் வெளியே வந்து ஆளுநரின் துன்புறுத்தலுக்கு எதிராக பேசினார். நேற்று கூட ஆளுநர், ஏன் என் அமைச்சர் அவரை எதிர்த்து பேசினார் என்று கேட்டார்.

இதுபோன்ற ஆயிரக்கணக்கான சம்பவங்களை நான் கேள்விப்பட்டேன். ஆனால் நான் அவற்றைக் கொண்டு வரவில்லை. நேற்று அந்தப் பெண்ணின் கண்ணீர் என் இதயத்தை உடைத்தது. ராஜ்பவனில் வேலை பார்க்க பயமாக இருக்கிறது என்று அழுது விட்டுச் சென்றபோது உங்கள் ஆட்களும் அங்கே இருந்தார்கள். சந்தேஷ்காலி பற்றி ஆளுநர் பேசினார். ஆனால், தன்னிடம் பணிபுரியும் ஒருவரிடம் ஏன் இப்படிச் செய்தார்? பிரதமர் ஏன் இதுகுறித்து எதுவும் பேசவில்லை? இவர்கள்தான் நம் தாய்மார்களின், சகோதரிகளின் மானத்தைப் பற்றிப் பேசுகிறார்கள் " என்று குற்றம் சாட்டினார்.