மாஸ் என்ட்ரி கொடுத்த விஜய்... பிரமாண்டமாக தொடங்கியது தவெக-வின் 2ம் ஆண்டு தொடக்க விழா!

நடிகர் விஜய் கடந்த ஆண்டு (2024) பிப்ரவரி மாதம் 2-ம் தேதி தமிழக வெற்றிக்கழகம் என்ற கட்சியை தொடங்கினார். கடந்த அக்டோபர் மாதம் விக்கிரவாண்டியில் பிரமாண்டமான மாநாட்டை நடத்தினார். அந்த மாநாட்டில், அரசியல் மற்றும் கொள்கை எதிரிகள் குறித்து விஜய் பேசியது பெரும் பரபரப்பை ஏற்படுத்தி இருந்தது. தொடர்ந்து, 2026 சட்டப்பேரவைத் தேர்தலை இலக்காக கொண்டு கட்சி வேலைகளில் விஜய் தீவிரம் காட்டி வருகிறார்.

இதற்கிடையே, தமிழக வெற்றிக் கழகம் கட்சி தொடங்கி கடந்த பிப்.2ம் தேதியுடன் ஓராண்டு நிறைவடைந்தது. இந்த நிலையில், தமிழக வெற்றிக்கழகத்தின் 2-ம் ஆண்டு தொடக்க விழா மாமல்லபுரம் பூஞ்சேரியில் உள்ள சொகுசு விடுதியில் இன்று (பிப்.26) பிரமாண்டமாக தொடங்கியுள்ளது. இவ்விழா மேள தாளம் என கோலகலமாக ஏற்பாடு செய்யப்பட்டுள்ளது. இதில் அக்கட்சியின் தலைவர் விஜய், பொதுச்செயலாளர் புஸ்ஸி ஆனந்த், ஆதவ் அர்ஜுனா, பிரசாந்த் கிஷோர் உள்ளிட்டோர் கலந்துக்கொண்டுள்ளனர்.

மேலும், இதில் தவெக நிர்வாகிகள் 3 ஆயிரம் பேர் கலந்து கொண்டுள்ளனர். பாஸ் வழங்கப்பட்ட நிர்வாகிகள் மட்டுமே அனுமதிக்கப்பட்டுள்ளனர். இதில் கலந்துக்கொண்டுள்ளவர்களுக்கு சைவ, அசைவ விருந்து தடபுடலாக ஏற்பாடு செய்யப்பட்டுள்ளது. இவ்விழாவில் தவெக தலைவர் விஜய், புஸ்ஸி ஆனந்த், ஆதவ் அர்ஜுனா, பிரசாந்த் கிஷோர் உள்ளிட்டோர் சிறப்புரையாற்ற உள்ளதாக கூறப்படுகிறது. இந்த விழாவில் விஜய் என்ன பேசப்போகிறார் என்ற எதிர்பார்ப்பு தொண்டர்கள் மத்தியில் எழுந்துள்ளது.