"எனக்குக் கிடைத்த அன்புக்கும், ஆதரவுக்கும் நன்றி" - நடிகை கவுரி கிஷன்!
நடிகை கவுரி கிஷன் அறிக்கை வெளியிட்டுள்ளார். அந்த அறிக்கையில், "இந்த வாரம் நடைபெற்ற ஒரு செய்தியாளர் சந்திப்பில், ஒரு யூடியூப் வ்லாக்கருடன் நடந்த உரையாடல் எதிர்பாராத விதமாக பதட்டமானதாக மாறியது. அந்தச் சம்பவத்தின் பின்னால் உள்ள பெரிய பிரச்சினையை ஏற்றுக்கொண்டு, கலைஞர்களுக்கும் ஊடகங்களுக்கும் இடையில் நாம் எந்தவிதமான உறவை உருவாக்க விரும்புகிறோம் என்பதைக் குறித்து அனைவரும் சேர்ந்து சிந்திக்க வேண்டிய நேரம் இது என்று நான் நம்புகிறேன்.
ஒரு பொதுமுகமாக, விமர்சனங்களும் ஆய்வுகளும் என் தொழிலின் ஒரு பகுதியாக இருப்பதை நான் புரிந்துகொள்கிறேன். ஆனால், ஒருவரின் உடல் அமைப்பு அல்லது தோற்றத்தை குறிவைத்து - நேரடியாகவோ மறைமுகமாகவோ - கேட்கப்படும் கருத்துகள் அல்லது கேள்விகள் எந்தச் சூழலிலும் ஏற்றுக் கொள்ளக்கூடியவை அல்ல. நான் கலந்து கொண்ட நிகழ்வில், எனது படைப்பை, அந்தத் திரைப்படத்தைப் பற்றிய கேள்விகளையே கேட்டிருந்தால் எனக்கு மகிழ்ச்சி இருந்திருக்கும். அதே கேள்வி, அதே தாக்கத்துடன், ஒரு ஆண் நடிகரிடம் கேட்கப்பட்டிருக்குமா என்பதையும் நான் எண்ணாமல் இருக்க முடியவில்லை.
அந்தச் சூழலில் நான் உறுதியாக நின்றதற்கு நான் நன்றி கூறுகிறேன். அது எனக்காக மட்டுமல்ல, இதுபோன்ற அனுபவத்தை எதிர்கொண்ட அனைவருக்காகவும் முக்கியமானது. இது புதிய பிரச்சினையல்ல; ஆனால் இன்னும் பரவலாக காணப்படுகிறது, உடல் அவமதிப்பை நகைச்சுவையாகக் காட்டி, யதார்த்தமற்ற அழகுக் கோட்பாடுகளை நிலைநிறுத்துவது வழக்கமாகிவிட்டது. இதுபோன்ற சூழலில் இருந்த அனைவருக்கும் இது ஒரு நினைவூட்டலாக இருக்க வேண்டும். நாம் பேச உரிமையுடையவர்கள். தவறு நடந்தால் அதை எதிர்கொண்டு கேள்வி எழுப்ப உரிமையுடையவர்கள். இந்தச் சுற்றத்தை முடிவுக்குக் கொண்டுவர முயல வேண்டிய பொறுப்பும் நமக்கே உண்டு.
அதே நேரத்தில் நான் தெளிவாகச் சொல்ல விரும்புகிறேன். இந்தச் செய்தி சம்பந்தப்பட்ட நபரை குறிவைத்து தாக்குதல் நடத்துவதற்கோ, அவமதிப்பதற்கோ அல்ல. மாறாக, இதை ஒரு வாய்ப்பாக எடுத்துக் கொண்டு, இருபுறத்திலும் அதிகமான கருணையுடன், உணர்வுப்பூர்வத்துடன், மரியாதையுடன் முன்னேறுவோம்.
எனக்குக் கிடைத்த அன்புக்கும் ஆதரவுக்கும் நான் ஆழ்ந்த நன்றி தெரிவிக்கிறேன். அது எனக்காக எதிர்பாராதது, மனதை நெகிழவைத்தது, பணிவை உணர்த்தியது. சென்னை பத்திரிகையாளர் சங்கத்திற்கும், ஏ.எம்.எம்.ஏ (மலையாள திரைப்படத் தொழிலாளர் சங்கம்), தென்னிந்திய நடிகர் சங்கத்திற்கும் அவர்களது அறிக்கைகளுக்காக நன்றி. ஊடகங்களுக்கும், மக்களுக்கும், தங்களது உறுதியான ஆதரவிற்கும் நன்றி. எனது சகக் கலைஞர்கள், தொழில்துறை நண்பர்கள், மற்றும் சமகாலத்தினரிடமிருந்து வந்த ஒற்றுமை மற்றும் ஆதரவிற்கும் நான் இதயம் கனிந்த நன்றியை தெரிவிக்கிறேன்". இவ்வாறு அதில் தெரிவிக்கப்பட்டுள்ளது.
