"தமிழ்நாட்டுக்கு பொக்கிஷம் கிடைக்க வேண்டும்" - தவெக தலைவர் #Vijay -ன் தந்தை எஸ்.ஏ.சந்திரசேகர் பேட்டி!

தமிழ்நாட்டிற்கு பொக்கிஷம் கிடைக்க வேண்டும் என தவெக தலைவர் விஜயின் தந்தை எஸ்.ஏ.சந்திரசேகர் தெரிவித்தார்.

தமிழ் சினிமாவின் உச்ச நட்சத்திரமான விஜய் கடந்த பிப்ரவரியில் தமிழக வெற்றிக் கழகம் எனும் கட்சியை தொடங்கினார். 2026 சட்டமன்ற தேர்தல்தான் தனது இலக்கு என அறிவித்த விஜய், சமீபத்தில் தனது கட்சிக் கொடியையும், பாடலையும் அறிமுகப்படுத்தினார். தமிழக வெற்றிக் கழகத்தின் முதல் மாநாடு விழுப்புரம் மாவட்டம், விக்கிரவாண்டியில் வரும் 27ம் தேதி நடைபெறவுள்ளது.

இதனையடுத்து, கடந்த அக். 4 ம் தேதி மாநாட்டுக்கான பந்தல் கால் நடும் நிகழ்ச்சி நடைபெற்றது. தொடர்ந்து, மாநாட்டுப் பணிகளை ஒருங்கிணைப்பதற்காக 27 குழுக்கள் அமைக்கப்பட்டுள்ளதுடன், 234 சட்டப்பேரவை தொகுதிகளுக்கும் தற்காலிக பொறுப்பாளா்கள் நியமிக்கப்பட்டுள்ளனர். மாநாட்டுக்கு இன்னும் ஒரு சில தினங்களே இருப்பதால், அதற்கான பணிகள் விறுவிறுப்பாக நடைபெற்று வருகின்றன.

அதன்படி, மாநாட்டு திடல் முழுவதும் 700 சிசிடிவி கேமராக்கள் பொருத்தப்பட்டு வருகிறது. மேலும், மாநாட்டு திடலில் சுமார் 50,000 பேர் அமரும் வகையில் இருக்கைகள் ஏற்பாடு செய்யப்பட்டுள்ளன. அதனுடன், மழை பெய்தாலும் பாதிக்காத வகையில், ஒரு சில அடிகள் உயரத்தில் பலகைகள் போடப்பட்டு அதன் மேல் இருக்கைகள் போடப்படுவதாக சொல்லப்படுகிறது.

தவெக தலைவர் விஜய் நடந்து சென்று தொண்டர்களைச் சந்திக்கும் வண்ணம் 800 மீட்டர் தூரத்திற்கு நடைமேடை அமைக்கப்பட்டுள்ளதாக கூறப்படுகிறது. மேலும், அதனுடன் அடிப்படையான பார்க்கிங், கழிவறை, குடிநீர், மருத்துவம், தீயணைப்புத் துறை உள்ளிட்ட வசதிகளும் ஏற்பாடு செய்யப்பட்டுள்ளன. மாநாட்டிற்காக ஏற்பாடுகள் 90 சதவீதம் முடிவடைந்துள்ளதாக தெரிவிக்கப்பட்டுள்ளது.

இம்மாநாட்டில் விஜய் ஏற்றப்போகும் நூறடி உயர கொடி அடுத்த 5 ஆண்டுகளுக்கு அதே இடத்தில் பறக்கும் என தெரிவிக்கப்பட்டுள்ளது. மாநாட்டு திடலில், 50 அடி உயர கட் அவுட்களில், காமராஜர், பெரியார் மற்றும் அம்பேத்கரின் கட் அவுட்களுக்கு மத்தியில் கைகூப்பியபடி பணிவுடன் விஜய் நிற்கும் கட் அவுட் இடம்பெற்றுள்ளது. சமீபத்தில் தவெக மாநாட்டை விளம்பரப்படுத்தும் விதமாக விக்கிரவாண்டி அருகே சென்னை - திருச்சி தேசிய நெடுஞ்சாலையில் தவெக தலைவர் விஜயின் முகம் பொறிக்கப்பட்ட ராட்சத பலூன்கள் பறக்கவிடப்பட்டுள்ளன.

இந்த சூழலில், தமிழக வெற்றிக் கழக மாநாடு வெற்றிப்பெற வேண்டி சென்னை கொரட்டூர் சாய் பாபா கோயிலில் தவெக தலைவர் விஜயின் பெற்றோர் இன்று (அக்.24) சிறப்பு வழிபாடு செய்தனர். இதனைத் தொடர்ந்து தவெக தலைவர் விஜயின் தந்தை எஸ்.ஏ.சந்திரசேகர் செய்தியாளர்களிடம் கூறியதாவது:

"தவெக மாநாடு சிறப்பாக நடைபெற வேண்டும், தவெக தலைவர் விஜய்க்கு நல்ல பெயர் கிடைக்க வேண்டும், அவர் பெரிய நிலைக்கு வரவேண்டும், தமிழ்நாட்டுக்கு பொக்கிஷம் கிடைக்க வேண்டும் என்பதற்காக வடசென்னையை சேர்ந்த மாறன், ரஞ்சித் உள்ளிட்டோர் கொரட்டூர் பாபா கோயிலில் அன்னதானம் செய்துள்ளனர்."

இவ்வாறு தவெக தலைவர் விஜயின் தந்தை எஸ்.ஏ.சந்திரசேகர் தெரிவித்தார்.