“திரையுலக சூப்பர் ஸ்டார் ரஜினி என்றால் அரசியலில் நம்மதான் சூப்பர் ஸ்டார்” - நாதக ஒருங்கிணைப்பாளர் #Seeman பேச்சு

திரையுலகின் சூப்பர் ஸ்டார் ரஜினிகாந்த் என்றால் நம்மதான் அரசியலில் சூப்பர் ஸ்டார் என நாம் தமிழர் கட்சி ஒருங்கிணைப்பாளர் சீமான் தெரிவித்துள்ளார்.

செங்கல்பட்டு மாவட்டம், மதுராந்தகத்தில் நாம் தமிழர் கட்சியின் மாவீரர் நாள் பொதுக்கூட்டம் நேற்று (நவ.27) நடைபெற்றது. இந்த பொதுக்கூட்டத்தில் சுமார் 7ஆயிரம் பேர் கலந்து கொண்டனர். இக்கூட்டத்தில் மாவீரர்களுக்கு வீரவணக்கம் செலுத்தப்பட்டது. அதன் பிறகு நாம் தமிழர் கட்சியின் கொடி ஏற்றப்பட்டு மெழுகுவர்த்தி ஏந்தி இரங்கல் தெரிவிக்கப்பட்டது. தொடர்ந்து, நாம் தமிழர் கட்சியின் ஒருங்கிணைப்பாளர் சீமான் மேடையில் பேசியதாவது,

"சுதந்திரம் என்ன என்று சொல்லி விதைத்தவர் உறங்கி விட்டார். ஆனால் விதைகள் என்றும்
உறங்காது. இந்த விடுதலை தீபத்தை அணையாமல் பாதுகாக்க வேண்டும். இன்னும் நாம் விழித்துக் கொள்ளவில்லை என்றால் இந்த இனத்தை காக்க வேறு யாரும் வர மாட்டார்கள். நம்மைப் பற்றி வரும் விமர்சனங்கள் கூட ஒரு பாராட்டு தான். விமர்சனத்தை நிரூபிக்க போராட வேண்டாம். நாம் இப்போது 8.22 சதவீதம் 36 லட்சம் வாக்குகள் பெற்று நாடாளுமன்றத் தேர்தலில் தனிப் பெரும்பான்மையை நிரூபித்து உள்ளோம்.

தமிழ்நாட்டில் உள்ள நீதிமன்றங்கள், மதுரையில் உள்ள உயர் நீதிமன்றம் ஆகியவை ஏரி
குளங்களில் தான் கட்டப்பட்டுள்ளது. ஏன் 'நீரின்றி அமையாது' உலகு எனக் கூறிய திருவள்ளுவருக்கே ஏரியை அழித்து கோட்டை கட்டப்பட்டுள்ளது. வேளச்சேரி, பள்ளிக்கரணை ஆகிய பகுதியில் உள்ள சதுப்பு ஏரி நிலத்தில் குப்பைகளை கொட்டியது யார்?

நான் இப்போதுதான் முதல்முறையாக நடிகர் ரஜினியை தனியாக சந்தித்து 2 1/4 மணி
நேரம் பேசினேன். நாங்கள் இருவரும் என்ன பேசினோம் என்பது யாருக்கும் தெரியாது. எங்கள் சந்திப்பு பல பேருக்கு கலக்கத்தை ஏற்படுத்தியுள்ளது. அவரை சந்தித்த நான் சங்கி என்றால் அவரை வைத்து ஆண்டுக்கு 2 படங்களை எடுத்து பல கோடிகளை சம்பாதிப்பவர்களையும், தங்கள் வீட்டில் நடக்கும் சுப நிகழ்ச்சிகளுக்கு அவரை அழைத்து கொண்டாடியவர்களையும் என்ன சொல்ல வேண்டும்.

திரையுலகின் சூப்பர் ஸ்டார் ரஜினிகாந்த் என்றால் நம்மதான் அரசியலில் சூப்பர் ஸ்டார். நானும் என் படையும் இருக்கும் வரை பரந்தூரில் விமான நிலையமோ, தமிழ்நாட்டில் எட்டு வழி சாலையோ, காட்டுப் பள்ளியில் துறைமுகமோ ஒருபோதும் அமைக்க முடியாது. தமிழ்நாட்டில் தமிழ் படித்தால் மட்டுமே வேலை என்ற நிலையை கொண்டு வருவேன். ஏனென்றால் தமிழ் என்பது எங்கள் கொள்கை மொழி, ஆங்கிலம் என்பது பயிற்சி மொழி. ஆகவே நாங்கள் தமிழை வளர்ப்போம்"

இவ்வாறு நாம் தமிழர் கட்சி ஒருங்கிணைப்பாளர் சீமான் தெரிவித்துள்ளார்.