நடிகை கௌரி கிஷனின் உடல் எடை குறித்த கேள்வி - வருத்தம் தெரிவித்த யூடியூபர்!

அபின் ஹரிஹரன் இயக்கத்தில், அறிமுக நடிகர் ஆதித்யா மாதவன்  நடிப்பில் உருவாகியுள்ள திரைப்படம் ‘அதர்ஸ்’. இப்படத்தில் ’96’ பட நடிகை கௌரி கிஷன் கதாநாயகியாக நடித்துள்ளார். இப்படம் நேற்று முன்தினம் (நவ.06) திரையரங்குகளில் வெளியானது. இப்படத்தின் முந்தைய செய்தியாளர் சந்திப்பில், “படத்தின் பாடலில் நடிகையை தூக்கினீர்களே நடிகையின் எடை என்ன?” என கதாநாயகனிடம் யூடியூபர் ஒருவர் கேள்வி எழுப்பினர். இது தொடர்பாக மற்றொரு தனியார் தொலைக்காட்சி நேர்காணலில் பேசிய கௌரி கிஷன், “இதுபோன்ற ஸ்டுப்பிட்டான கேள்விகள் எழுப்பப்படுகிறது. இதுபோன்ற கேள்விகள் சரியான கேள்விகள் அல்ல” என பேசியிருந்தார்.

இந்த சூழிலில், கடந்த 5ம் தேதி நடைபெற்ற ‘அதர்ஸ்’ பட செய்தியாளர் சந்திப்பில், நடிகை கௌரி கிஷனை டார்கெட் செய்யும் விதமாக யூடியூபர்கள் இருவர் மாறி மாறி கேள்விகளை எழுப்பியதாக தெரிகிறது. இதற்கு பதில் அளித்த நடிகை கௌரி கிஷன், “உடல் எடை தொடர்பாக எழுப்பப்பட்ட கேள்வி என்னை உருவக் கேலி செய்ததற்கு சமம். கதாநாயகனிடம் கேட்டாலும், அது என்னுடைய எடை தொடர்பாகவே எழுப்பப்பட்ட கேள்வி, எனவே அந்த கேள்வி தொடர்பாக நான் விமர்சனம் செய்திருந்தேன்” என பதில் அளித்தார்.

இருப்பினும், நடிகை கௌரி கிஷனை பேசவிடாமல் மாறி மாறி சத்தம் எழுப்பியதால் நடிகை கௌரி கிஷன் கண்கலங்கியதாக கூறப்படுகிறது. மேலும், அவர் “செய்தியாளர் சந்திப்பில் ஒரு பெண் கூட இல்லாத நிலையில் இந்த தரமற்ற செயலுக்கு யாரும் கேள்வி எழுப்பமாட்டுகிறீர்கள்” என கேள்வி எழுப்பினார். பின்னர், நடிகை கௌரி கிஷன் செய்தியாளர் சந்திப்பு முடிந்து மௌனமாக புறப்பட்டு சென்றார். இதனையடுத்து, நடிகை கௌரி கிஷனுக்கு பிரபலங்கள் பலரும் ஆதரவு தெரிவித்தனர். மேலும், சம்பந்தப்பட்ட யூடியூபருக்கு கண்டனம் தெரிவித்து வந்தனர். இந்த நிலையில், கௌரி கிஷனின் உடல் எடை குறித்து  கேள்வி எழுப்பிய யூடியூபர் வருத்தம் தெரிவித்து வீடியோ வெளியிட்டுள்ளார்.

அதில், "இரண்டு நாட்களாக மன உளைச்சலாக உள்ளது. காரணம் கெளரி கிஷன் சம்பவம்தான். நான் ஒரு விதத்தில் கேட்டேன். அவர்கள் ஒரு விதத்தில் ஸ்டுப்பிட் மாரி கேட்காதீங்கனு சொன்னார்கள். பதிலுக்கு அடுத்த செய்தியாளர்கள் சந்திப்பில் கேள்வி கேட்டேன். நான் அவரை உருவ கேலி செய்யவில்லை. ஜாலியாக கேட்ட கேள்வி, தவறாக புரிந்துகொள்ளப்பட்டது. அவரின் மனதை நோகடிக்க வேண்டும் என்ற எண்ணம் எனக்கில்லை. இதனால் அவருக்கு மன வருத்தம் ஏற்பட்டிருந்தா அதற்கு நானும் வருத்தம் தெரிவிச்சுக்கிறேன்" என்று யூடியூபர் தெரிவித்தார்.