#ProKabaddiLeague | தபாங் டெல்லி அணியை வீழ்த்தி பாட்னா பைரட்ஸ் அபார வெற்றி!

புரோ கபடி லீக் போட்டியின் இன்றைய ஆட்டத்தில்  தபாங் டெல்லியை வீழ்த்தி பாட்னா பைரட்ஸ் அணி அபார வெற்றி பெற்றது.

11-வது புரோ கபடி லீக் போட்டி ஐதராபாத்தில் கடந்த 18ம் தேதி தொடங்கியது. இதில் பங்கேற்றுள்ள 12 அணிகள் தங்களுக்குள் தலா 2 முறை மோத வேண்டும். லீக் சுற்று முடிவில் முதல் 6 இடங்களை பிடிக்கும் அணிகள் ‘பிளே-ஆப்’ சுற்றுக்கு தகுதி பெறும். லீக்கில் ‘டாப்-2’ இடங்களை வசப்படுத்தும் அணிகள் நேரடியாக அரையிறுதிக்குள் அடியெடுத்து வைக்கும். 3 முதல் 6 இடங்களை பெறும் அணிகள் வெளியேற்றுதல் சுற்றில் மோதி அதில் வெற்றி பெறும் 2 அணிகள் அரையிறுதிக்கு தகுதி பெறும்.

இந்த நிலையில், இந்த தொடரில் இன்று நடைபெற்ற முதல் ஆட்டத்தில் பாட்னா பைரட்ஸ் - தபாங் டெல்லி அணிகள் மோதிக்கொண்டன. இதில் ஆரம்பம் முதலே இரு அணிகளும் மாறி மாறி புள்ளிகளை எடுக்க ஆர்வம் காட்டின. இதில் பாட்னா பைரட்ஸ் அணியில் ரெய்டில் அதிகபட்சமாக தேவாங்க் 12 புள்ளிகளும், அயன் 12 புள்ளிகளும் எடுத்தனர். அதேபோல், தபாங் டெல்லி அணி தரப்பில் ரெய்டில் ஆஷுமாலிக் 10 புள்ளிகளும், வினய்வீரேந்தர் 10 புள்ளிகளும் எடுத்தனர்.

இவ்வாறு இரு அணிகளும் புள்ளிகளை சேர்ப்பதில் தீவிரம் காட்டியதால் ஆட்டம் விறுவிறுப்பாக அமைந்தது. இரு அணிகளும் ரெயிட் மற்றும் டேக்கிளில் புள்ளிகளை அள்ளியது. இறுதியாக 44-30 என்ற புள்ளி கணக்கில் தபாங் டெல்லியை வீழ்த்தி பாட்னா பைரட்ஸ் அணி அபார வெற்றி பெற்றது. இதனையடுத்து 2வது ஆட்டத்தில் யு மும்பா - ஜெய்ப்பூர் பிங்க் பேந்தர்ஸ் அணிகள் விளையாடி வருகின்றன.