”நிதிஷ் குமார் பச்சோந்தியை விட மோசமாக செயல்படுகிறார்" - ஜெய்ராம் ரமேஷ் தாக்கு.!

பாஜக எம்.எல்.ஏ.க்களின் ஆதரவு கடிதத்தை நிதீஷ் குமார் ஆளுநரிடம் வழங்கினார். தொடர்ந்து பீகாரில் ஆட்சி அமைப்பதற்கும் உரிமை கோரியுள்ளார். 243 உறுப்பினா்களைக் கொண்ட பீகாா் சட்டப் பேரவையில், ஐக்கிய ஜனதா தளம் மற்றும் பாஜகவுக்கு உள்ள 128 எம்.எல்.ஏ.க்களின் ஆதரவு கடிதத்தை பீகார் ஆளுநரிடம் நிதீஷ் குமார் வழங்கினார். இன்று மாலையே பாஜக ஆதரவுடன் மீண்டும் முதலமைச்சராக நிதீஷ் குமார் பதவியேற்க உள்ளதாக கூறப்படுகிறது.

இந்த நிலையில் இதுகுறித்து அரசியல் கட்சியினர் பலரும் விமர்சனம் செய்து வருகின்றனர். காங்கிரஸ் கட்சியின் தேசிய பொதுச் செயலாளார் ஜெய்ராம் ரமேஷ் இது குறித்து தெரிவித்ததாவது..

“ நிதிஷ் குமாரின் இந்த அரசியல் நாடகம்  மக்கள் கவனத்தை காங்கிரஸின் இந்திய ஒற்றுமை நீதிப் பயணத்திலிருந்து திசை திருப்ப செய்யப்படும் முயற்சியாகும்.  காங்கிரஸின் நடைப்பயணத்தைப் பார்த்து பாஜக அஞ்சுகிறது. அதனால்தான் இதுபோன்ற நாடகங்களை அரங்கேற்றுகிறது.

'பீகார் முதலமைச்சர் நிதிஷ் குமார் அரசியல் கூட்டணிகளை அடிக்கடி மாற்றிக்கொள்வதன் மூலம் பச்சோந்திகளை போல நிறம் மாறுகிறார். அவர் பச்சோந்திகளுக்கே கடும் போட்டியாக இருப்பார். பீகார் மக்கள் நிதீஷ் குமாரின் துரோகத்தை ஒரு நாளும் மன்னிக்கமாட்டார்கள் ” என ஜெய்ராம் ரமேஷ் தனது எக்ஸ் பக்கத்தில் தெரிவித்துள்ளார்.