மதராசி முகாம் இடிக்கப்பட்ட விவகாரம் - ரேகா குப்தாவுக்கு முதலமைச்சர் மு.க. ஸ்டாலின் கடிதம்!

டெல்லியில் தமிழந்கள் வாழ்ந்த மதராசி முகாம் இடிக்கப்பட்ட விவகாரம் தொடர்பாக, பாதிக்கப்பட்ட மக்களுக்கு தேவையான வசதிகளை ஏற்படுத்தி தரக் கோரி அம்மாநில முதலமைச்சர் ரேகா குப்தாவை தமிழ்நாடு முதலமைச்சர் மு.க. ஸ்டாலின் வலியுறுத்தியுள்ளார்.

இது தொடர்பாக டெல்லி முதலமைச்சருக்கு அவர் எழுதிய கடிதத்தில், “ஜூன் 1, 2025 அன்று ஜங்புராவின் மதராசி முகாம் இடிக்கப்பட்டதால் ஏற்பட்ட மனிதாபிமான நெருக்கடி குறித்து உங்கள் அவசர கவனத்தை ஈர்க்க விரும்புகிறேன்.  பல தசாப்தங்களாக டெல்லியின் பொருளாதாரத்திற்கு குறிப்பிடத்தக்க பங்களிப்பை அளித்து வந்த 370 தமிழ் வம்சாவளி குடும்பங்கள் வீடற்றவர்களாகவும், ஆதரவற்றவர்களாகவும் மாறியுள்ளனர்.

டெல்லி உயர் நீதிமன்றத்தின் உத்தரவுகளின்படி, ஒரு கூட்டு கணக்கெடுப்பு 189 குடும்பங்களை EWS அடுக்குமாடி குடியிருப்புகளுக்கு தகுதியானவர்கள் என்று சான்றளித்தது. ஒதுக்கப்பட்ட மாற்று இடமான நரேலாவின் G-7 மற்றும் G-8 பகுதிகளில் தண்ணீர், மின்சாரம், சுகாதாரம், உள் சாலைகள், வடிகால் மற்றும் தெரு விளக்குகள் போன்ற அனைத்து அத்தியாவசிய சேவைகளையும் முடிக்குமாறு அரசு நிறுவனங்களுக்கு  உயர் நீதிமன்றம் உத்தரவிட்டுள்ளது.

மேலும், அருகிலுள்ள அரசு மற்றும் எம்சிடி பள்ளிகளில் இடம்பெயர்ந்த குழந்தைகளுக்கு உடனடி சேர்க்கையை உறுதி செய்யவும், ஆரம்ப சுகாதார நிலையங்கள் மற்றும் நியாய விலைக் கடைகளை நிறுவவும், 2016 கொள்கையின்படி தேவையான அரசு பேருந்து மற்றும் மெட்ரோ போக்குவரத்து இணைப்புகளை ஏற்பாடு செய்யவும் நீதிமன்றம் டெல்லி அரசுக்கு உத்தரவிட்டது.

ஆனால், துரதிர்ஷ்டவசமாக நரேலாவில் 189 குடும்பங்களுக்கு முறையாக EWS அடுக்குமாடி குடியிருப்புகள் ஒதுக்கப்பட்டிருந்தாலும், அத்தியாவசிய சேவைகள் முழுமையாக வழங்கப்படாததால், அந்த இடம் தகுதியற்றதாக உள்ளது. அங்கு பயன்பெற்றவர்கள் தங்கள் பணியிடங்களில் இருந்து கிட்டதட்ட 20 கிலோ மீட்டர் தொலைவில் இருக்கின்றனர். அவர்களுக்கு பிரத்யேக போக்குவரத்து வசதியும் ஏற்படுத்தவில்லை. மேலும், 150க்கும் மேற்பட்ட தமிழ் வழியில் பயிலும் குழந்தைகளுக்கான கல்வி ஏற்பாடுகளும் நீதிமன்றத்தின் உத்தரவுகளின்படி செயல்படுத்தப்படவில்லை.

இந்த வசதிகள் இல்லாததால், குடும்ப வருமானம் ஈட்டுபவர்கள், குறிப்பாக பெண்கள்  வேலையில்லாமல் உள்ளனர். மேலும் மாணவர்கள் தங்கள் படிப்புக்கு உடனடி இடையூறுகளை எதிர்கொள்கின்றனர். இது இந்த பாதிக்கப்படக்கூடிய சமூகத்தின் இடப்பெயர்ச்சி துயரத்தை அதிகரிக்கும் வகையில் உள்ளது. மீதமுள்ள 181 குடும்பங்களுக்கு மாற்று இடம் ஒதுக்கப்படாமல் வீடற்றவர்களாக விடப்பட்டுள்ளனர்.

இந்த நெருக்கடியின் தீவிரத்தை கருத்தில் கொண்டு, இடம்பெயர்ந்த குடும்பங்களின் கஷ்டத்தை போக்க உடனடியாக நடவடிக்கை எடுத்து பின்வரும் நடவடிக்கைகளை எடுக்குமாறு உங்கள் அரசாங்கத்தை நான் 2 தீவிரமாக வலியுறுத்துகிறேன்:

1. 189 EWS குடியிருப்புகளை முழு வடிவத்தில் கட்டி உரிமை பெற்ற குடும்பங்களுக்கு ஒப்படைக்க வேண்டும். அங்குள்ள சமூக உள்கட்டமைப்பை விரைவாகக் கண்காணிக்க வேண்டும். பிரத்யேக போக்குவரத்து சேவைகளை வழங்க ஏற்பாடு செய்ய வேண்டும்.

2. மீதமுள்ள 181 இடம்பெயர்ந்த குடும்பங்களுக்கு வருமான உச்சவரம்பு, இருப்பிடத் தேவைகள் மற்றும் வைப்புத்தொகை கடமைகளில் சிறப்பு தளர்வுகளை வழங்கி, அதன் மூலம் குடிசை மற்றும் ஜேஜே மறுவாழ்வுக் கொள்கையின் கீழ் EWS வீட்டுத் தகுதியை விரிவுபடுத்த வேண்டும்.

3. உடனடி சேர்க்கை மற்றும் பிரத்யேக போக்குவரத்து வசதியுடன் கூடிய பாக்கெட் ஜி-7 இல் ஒரு தற்காலிக டெல்லி தமிழ் கல்வி சங்கத்தின் பள்ளியை அனுமதிக்க வேண்டும். அல்லது நிரந்தர வசதிகள் தயாராகும் வரை ஒதுக்கப்பட்ட இடங்கள் மற்றும் இடைக்கால போக்குவரத்து வசதியுடன் அருகிலுள்ள டெல்லி மாநகராட்சி பள்ளியில் தமிழ் கற்பித்தலை அங்கீகரித்து, தற்காலிக தமிழ் வழிப் பள்ளிப் படிப்பை நிறுவ வேண்டும்.

4. குறிப்பாக இடம்பெயர்ந்த பெண்களுக்கு தொழில் பயிற்சி மற்றும் நுண் நிறுவன மானியங்கள் மூலம் வாழ்வாதார ஆதரவைத் திரட்ட ஏற்பாடு செய்ய வேண்டும்.

உங்கள் நிர்வாகம் இந்தப் பிரச்சினையை இரக்கத்துடன் கையாளும் என்றும்  பாதிக்கப்பட்ட குடும்பங்களின் வாழ்வாதாரத்தை மீட்டெடுக்க மேற்கண்ட நடவடிக்கைகளை எடுக்கும் என்றும் நம்புகிறேன். உங்கள் நேர்மறையான பதிலுக்காக எதிர்நோக்கியுள்ளேன். மேலும் இடம்பெயர்ந்த அனைத்து குடும்பங்களின் சுமூகமான, கண்ணியமான மறுவாழ்வை உறுதி செய்வதற்கு எந்த வகையிலும் உதவத் தயாராக இருக்கிறேன்” என்று குறிப்பிடப்பட்டுள்ளது.