ஈரோடு | சாலை விபத்தில் Insta பிரபலம் உயிரிழப்பு!

ஈரோடு மாவட்டம் கருங்கல்பாளையம் பகுதியை சேர்ந்தவர் பிரபாகரன். இவரது மகன் ராகுல் (வயது 27). இவர் இன்ஸ்டகிராமில் வீடியோக்களை பதிவிட்டு மக்கள் மத்தியில் பிரபலமாக காணப்பட்டார். இவர் கோபிசெட்டிபாளையம் அருகே உள்ள கவுந்தப்பாடி நேரு நகரைச் சேர்ந்த வேலுமணி என்பவரது மகளை கடந்த சில தினங்களுக்கு முன்பு திருமணம் செய்துக் கொண்டார்.

இந்த நிலையில், இவர் நேற்று இரவு சுமார் 10:30 மணியளவில் ஈரோட்டில் இருந்து கவுந்தப்பாடியில் உள்ள தனது மாமியார் வீட்டிற்கு இருசக்கர வாகனத்தில் சென்றுக்கொண்டிருந்தார். அப்போது, கட்டுப்பாட்டை இழந்த இவரது இருசக்கர வாகனம் பாலத்தின் நடுவே உள்ள சென்டர் மீடியனில் மோதி விபத்துக்குள்ளானது.

இந்த விபத்தில் அவரது இருசக்கர வாகனம் தூக்கி வீசப்பட்டு சுமார் 50 மீட்டர் தூரத்திற்கு இழுத்துச் சென்றது. இதில் தலையில் பலத்த காயமடைந்த ராகுல் சம்பவ இடத்திலேயே உயிரிழந்தார். தகவல் அறிந்து சம்பவ இடத்திற்கு விரைந்து வந்த கவுந்தப்பாடி போலீசார் ராகுலின் உடலை மீட்டு உடற்கூராய்விற்காக கோபிசெட்டிபாளையம் அரசு மருத்துவமனைக்கு அனுப்பி வைத்தனர்.

ராகுல் தலைக்கவசம் அணியாததே அவரது உயிரிழப்பு காரணம் என்று கூறப்படுகிறது. மேலும், போலீசார் இச்சம்பவம் குறித்து வழக்குப் பதிவு செய்து விசாரணை நடத்தி வருகின்றனர். சாலை விபத்தில் இன்ஸ்டகிராம் பிரபலம் உயிரிழந்த சம்பவம் இணையவாசிகள் மத்தியில் சோகத்தை ஏற்படுத்தியுள்ளது.