டங்கி டிராப் 1: டீஸர் கூறும் கதை என்ன?
ஷாருக்கானின் பிறந்தநாளில் டங்கி படத்தின் டீசர் வெளியாகி ரசிகர்களிடம் அமோக வரவேற்பை பெற்றுள்ளது.
‘3 இடியட்ஸ்’, ‘பிகே’, ‘சஞ்சு’ உள்ளிட்ட படங்களை இயக்கிய இயக்குநர் ராஜ்குமார் ஹிரானி இயக்கத்தில் ஷாருக்கான் நடித்து வரும் திரைப்படம் ‘Dunki’. இந்தப் படத்தில் ஷாருக்கானுக்கு ஜோடியாக டாப்சி நடிக்கிறார். அட்லி இயக்கத்தில், ஷாருக்கான் நடித்த ‘ஜவான்’ திரைப்படம் மாபெரும் வெற்றி பெற்று, 1000 கோடி ரூபாய்க்கும் மேல் வசூலித்ததால், ‘Dunki’ மீதும் ரசிகர்களின் எதிர்பார்ப்பு அதிகரித்துள்ளது.
அண்மையில், இப்படத்தின் ரிலீஸ் குறித்த அப்டேட் வெளியானது. அதன்படி இந்த ஆண்டு டிசம்பர் மாதம், கிறிஸ்துமஸ் பண்டிகையை முன்னிட்டு ‘Dunki’ திரைப்படம் வெளியாக உள்ளது. ஷாருக்கான் இருக்கும் போஸ்டரும் வெளியாகி ரசிகர்களின் வரவேற்பைப் பெற்றிருந்தது.
இந்நிலையில் இன்று ‘DunkiDrop1’ என்ற பெயரில் டீசர் ஒன்றை படக்குழு வெளியிட்டுள்ளது. ஹார்டி என்ற கதாபாத்திரத்தில் ஷாருக்கானும், மனு என்ற கதாபாத்திரத்தில் டாப்சியும் படத்தில் நடிக்கின்றனர். ஆக்ஷன், நகைச்சுவை என எண்டர்டெயின்மென்ட் நிறைந்த படமாக ‘Dunki’ இருக்கும் என்பது வெளியான டீசரின் மூலம் தெரிய வருகிறது. விரைவில் ‘DunkiDrop2’ வெளியாகும் என்ற அறிவிப்பும் வெளியிடப்பட்டுள்ளது.
படத்தின் கதை:
'டங்கி' படத்தின் இந்த டீஸர் ஒரு பாலைவனத்தில் இருந்து தொடங்குகிறது. இதில் ஷாருக்கான் சிலருடன் பயணம் செய்வது போல் தெரிகிறது. இதற்கிடையில், ஒரு நபர் அவர்கள் மீது துப்பாக்கியால் குறிவைக்கிறார். பின்னர், 'டங்கி' கதையின் ஃப்ளாஷ்பேக் தொடங்குகிறது, அதில் ஷாருக் கானும் அவரது நான்கு நண்பர்களும் தங்கள் வாழ்க்கையை மகிழ்ச்சியாக வாழ்கிறார்கள், ஆனால் அவர்கள் அனைவரும் வெளிநாடு சென்று தங்கள் வாழ்க்கையை வாழ விரும்புகிறார்கள்.
ஷாருக்கானின் 'ஹார்டி' கதாபாத்திரம் 'மனு' அதாவது டாப்ஸி பண்ணுவை காதலிப்பதாகவும் டீசரில் காட்டப்பட்டுள்ளது. ஷாருக் கான் இந்த நான்கு நண்பர்களையும் தனது குடும்பமாக கருதுகிறார். மேலும் அவர் தனது குடும்பத்திற்காக எதையும் செய்ய முயலதாகவும் காட்டப்பட்டுள்ளது.
