ஹரியானா தேர்தலில் வெற்றிபெற்ற வினேஷ் போகத்துக்கு துணை முதல்வர் உதயநிதி ஸ்டாலின் வாழ்த்து!

தேர்தலில் வெற்றிபெற்ற வினேஷ் போகத்துக்கு துணை முதல்வர் உதயநிதி ஸ்டாலின் வாழ்த்து தெரிவித்துள்ளார்.

ஹரியானா சட்டப்பேரவைத் தேர்தலில் ஜூலானா தொகுதியில் காங்கிரஸ் வேட்பாளரும், மல்யுத்த வீராங்கனையுமான வினேஷ் போகத் தனது வெற்றியைப் பதிவு செய்தார்.

இதுகுறித்து தமிழ்நாடு துணை முதல்வர் உதயநிதி ஸ்டாலின் தனது எக்ஸ் தளப் பக்கத்தில் வினேஷ் போகத்தை வாழ்த்தி பதிவு ஒன்றை வெளியிட்டுள்ளார். அந்தப் பதிவில், “இந்தியாவின் நட்சத்திர வீராங்கனைக்கு எனது மனமார்ந்த வாழ்த்துக்கள். காங்கிரஸ் சார்பில் போட்டியிட்ட வினேஷ் போகத் ஹரியானாவில் ஜூலானா சட்டபேரவைத் தொகுதியில் இருந்து வெற்றி பெற்றுள்ளார். மக்களுக்கான பிரதிநிதியாக மக்கள் சேவையின் இந்த புதிய அத்தியாயத்தில் அவர் சிறப்பான வெற்றிபெற வாழ்த்துகிறேன். பாசிச சக்திகளுக்கு எதிராக அவரது ஆற்றல் தொடரட்டும்” எனப் பதிவிட்டுள்ளார்.

முன்னதாக, ஜூலானா தொகுதியில் காங்கிரஸ் சார்பில் போட்டியிட்ட மல்யுத்த வீராங்கனை வினேஷ் போகத் பாஜகவின் யோகேஷ் குமாரைவிட 6,015 வாக்குகள் வித்தியாசத்தில் வெற்றி பெற்றார். வினேஷ் போகத் 65,080 வாக்குகளும், யோகேஷ் குமார் 59, 065 வாக்குகளும், இந்திய தேசிய லோக் தளம் கட்சியின் சுரேந்தர் 10,158 வாக்குகளும் பெற்றனர். ஆம் ஆத்மியின் கவிதா ராணி 1,280 வாக்குகள் மட்டுமே பெற்றார்.