திடீர் உடல்நலக் குறைவு - ஜார்க்கண்ட் இந்தியா கூட்டணி பேரணியில் ராகுல் காந்தி பங்கேற்கமாட்டார் என காங்கிரஸ் அறிவிப்பு!

திடீர் உடல்நலக் குறைவு காரணமாக ஜார்க்கண்ட்  மாநிலம் ராஞ்சியில் நடைபெறும் இந்தியா கூட்டணி பேரணியில் ராகுல் காந்தி பங்கேற்கமாட்டார் என காங்கிரஸ் அறிவித்துள்ளது.

இந்தியா கூட்டணி ஆரம்பிக்கப்பட்டு அதில் 20க்கும் மேற்பட்ட கட்சிகள் இணைந்துள்ளன. நடைபெற்று வருகிற மக்களவைத் தேர்தலில் ஆளும் கட்சியான பாஜகவின் தேசிய ஜனநாயக கூட்டணிக்கு இந்தியா கூட்டணி உருவாக்கப்பட்டு அதன்மூலம் தேர்தலை எதிர்கொள்கின்றன.

இந்தியா கூட்டணியின் முக்கிய கட்சிகளாக காங்கிரஸ் , டெல்லியில் ஆம் ஆத்மி, தமிழ்நாட்டில் திமுக, மேற்கு வங்கத்தில் மம்தா பானர்ஜி, உத்தர பிரதேசத்தில் அகிலேஷ் யாதவின் சமாஜ்வாதி கட்சி பீகாரில் லல்லு பிரசாத் யாதவின் ராஷ்ட்ரிய ஜனதா தளம், மகாராஷ்டிராவின் சிவசேனா மற்றும் தேசியவாத காங்கிரஸ், காஷ்மீரின் தேசிய மாநாட்டு கட்சி மற்றும் மக்கள ஜனநாயக கட்சி உள்ளிட்ட கட்சிகள் இந்தியா கூட்டணியில் இடம்பெற்றுள்ளன.

மேற்கு வங்கம் மற்றும் கேரளாவில் திரிணாமுல் காங்கிரஸ் மற்றும் சிபிஎம் இந்தியா கூட்டணி இடம்பெற்றிருந்தாலும் அங்கே தனித்தே களம் காண்கின்றன. ஏற்கனவே பீகாரில் நிதிஷ் குமார் இந்தியா கூட்டணியில் இருந்து விலகிச் சென்றுள்ளார். இந்தியா கூட்டணியின் ஆலோசனைக் கூட்டம் மும்பை, கர்நாடகா, பீகார் மற்றும் டெல்லியில் நடைபெற்றது.  மக்களவைத் தேர்தல் 7கட்டங்களாக நடைபெற்று வரும் நிலையில் இந்தியா கூட்டணி சார்பில் தேர்தல் பிரச்சார பொதுக்கூட்டங்களும், பேரணிகளும் நடைபெற்று வருகின்றன.

இந்த நிலையில் இன்று ஜார்க்கண்டில் நடைபெறும் இந்தியா கூட்டணியின் பேரணியில் ராகுல் காந்தி, மல்லிகார்ஜுன கார்கே உள்ளிட்ட தலைவர்கள் கலந்து கொள்வார்கள் என அறிவிக்கப்பட்டது. இந்த நிலையில் திடீர் உடல்நலக் குறைவு காரணமாக இந்தியா கூட்டணியின் பேரணியில் ராகுல் காந்தி பங்கேற்கமாட்டர் என காங்கிரஸ் செய்தி தொடர்பாளர் ஜெய்ராம் ரமேஷ் அறிவித்துள்ளார்.

श्री राहुल गांधी आज सतना और रांची में चुनाव प्रचार के लिए पूरी तरह से तैयार थे, जहां INDIA की रैली हो रही है। लेकिन वह अचानक बीमार हो गए हैं और फिलहाल नई दिल्ली से बाहर नहीं जा सकते हैं। कांग्रेस अध्यक्ष श्री मल्लिकार्जुन खरगे जी अवश्य सतना में जनसभा को संबोधित करने के बाद रांची…

— Jairam Ramesh (@Jairam_Ramesh) April 21, 2024

இது தொடர்பாக அவர் வெளியிட்டுள்ள செய்திக் குறிப்பில் தெரிவித்துள்ளதாவது..

“ஜார்க்கண்ட் மாநிலம் ராஞ்சியில் நடைபெறும் இந்தியா கூட்டணியின் பேரணியில் ராகுல் காந்தி இன்று பிரச்சாரம் செய்வார் என எதிர்பார்க்கப்பட்டது. அவருக்கு திடீரென உடல்நலக்குறைவு ஏற்பட்டதால், தற்போது அவரால் டெல்லியை விட்டு வர இயலவில்லை. காங்கிரஸ் தலைவர் மல்லிகார்ஜுன கார்கே, ஜார்கண்ட் மாநிலம் சத்னாவில் பொதுக் கூட்டத்தில் உரையாற்றிய பிறகு, ராஞ்சி பேரணியில் நிச்சயமாக கலந்து கொள்வார்” என ஜெய்ராம் ரமேஷ் தெரிவித்துள்ளார்.