#Amaran | #SK -வின் ‘அமரன்’ திரைப்படம் - படப்பிடிப்பு அனுபவம் குறித்த வீடியோ வெளியீடு!

சிவகார்த்திகேயன் நடித்து வெளியாகி வெற்றிநடைபோடும் ‘அமரன்’ திரைப்படத்தின் படப்பிடிப்பு தளத்தில் படக்குழு மற்றும் நடிகர்களின் அனுபவங்கள் குறித்த வீடியோ வெளியிடப்பட்டுள்ளது.

தீபாவளிக்கு வெளிவந்த அமரன் மக்களால் கொண்டாடப்பட்டு மாபெரும் வெற்றியடைந்தது. சிவகார்த்திகேயன் – ராஜ்குமார் பெரியசாமி கூட்டணியில் உருவான இப்படத்தை கமல்ஹாசன் தயாரித்துள்ளார். இப்படத்தில் சாய் பல்லவி கதாநாயகியாக நடிக்க ஜி.வி. பிரகாஷ் குமார் இசையமைத்திருந்தார்.

இந்திய ராணுவத்தில் சேவை செய்து நாட்டிற்காக உயிர்நீத்த மேஜர் முகுந்த் வரதராஜனின் வாழ்க்கையை மையமாக வைத்து எடுக்கப்பட்ட இப்படம் வெற்றியடைந்துள்ளது. அதிகாரப்பூர்வ வெளியீட்டின்படி, உலகளவில் இதுவரை ரூ.195 கோடிக்கும் மேல் வசூல் செய்துள்ளது. 9 நாட்களை பாக்ஸ் ஆபிஸில் கடந்துள்ள அமரன் இதுவரை தமிழ்நாட்டில் மட்டுமே ரூ.98 கோடி வசூல் செய்துள்ளது. நாளை ரூ. 100 கோடியை கடந்துவிடும் என்பது குறிப்பிடத்தக்கது.

இந்நிலையில், படப்பிடிப்பு தளத்தில் படக்குழு மற்றும் நடிகர்களின் அனுபவங்கள் குறித்த வீடியோ வெளியிடப்பட்டுள்ளது. அந்த வீடியோவில் படப்பிடிப்பு தளத்தில் நடைபெற்ற சுவாரஸ்யங்கள் குறித்து படக்குழுவினர் பகிர்ந்துள்ளனர். மேலும் படப்பிடிப்பு தளத்தின் பல்வேறு இடங்கள் இந்த வீடியோவில் இடம்பெற்றுள்ளன. தற்போது இந்த வீடியோ வைரலாகி வருகிறது.