#Accident | ஓடும் ரயிலில் ஏற முயன்று தண்டவாளத்தில் தவறி விழுந்த மாணவி... அடுத்து நடந்தது என்ன?

கண்ணூர் ரயில் நிலையத்தில் ஓடும் ரயிலில் ஏற முயன்று நர்சிங் மாணவி ஒருவர் தண்டவாளத்தில் விழுந்த சம்பவம் பரபரப்பை ஏற்படுத்தியுள்ளது.

கேரள மாநிலம் கண்ணூர் ரயில் நிலையத்திற்கு நேற்று (நவ.3) காலை 8 மணியளவில் புதுச்சேரி எக்ஸ்பிரஸ் ரயில் வந்தது. அந்த ரயிலில் பயணம் செய்த நர்சிங் மாணவி ரயிலில் இருந்து இறங்கி நடைமேடையில் உள்ள கடையில் பொருட்கள் வாங்கிக் கொண்டிருந்தார். அவர் பொருட்கள் வாங்கிக்கொண்டிருந்போதே ரயில் கிளம்பியது. இதனைப் பார்த்த அந்த மாணவி வேகமாக சென்று ஓடும் ரயிலில் ஏற முயற்சித்துள்ளார்.

அப்போது எதிர்பாராத விதமாக அந்த மாணவி ரயிலுக்கும் நடைமேடைக்கும் இடையே உள்ள பாதையில் தவறி விழுந்தார். இதனைப் பார்த்து, அதிர்ச்சியடைந்த சக பயணிகள் உடனடியாக அபாய சங்கிலியை பிடித்து இழுத்து ரயிலை நிறுத்தினர். ரயில் நின்ற உடன் பயணிகள் ரயிலில் இருந்து இறங்கி பார்த்துள்ளனர்.

அப்போது, மாணவி ரயில் தண்டவாளத்தில் சிறு காயங்களுடன் உயிருடன் இருப்பதை கண்டனர். உடனடியாக அவரை மீட்ட ரயில்வே போலீசார் சிகிச்சைக்காக மருத்துமனைக்கு அனுப்பி வைத்தனர். அங்கு அவருக்கு சிகிச்சை அளிக்கப்பட்டு வருகிறது. ஓடும் ரயில் ஏற முயன்று மாணவி தண்டவாளத்தில் விழுந்த சம்பவம் அப்பகுதியில் பரபரப்பை ஏற்படுத்தியது.