பொங்கல் ரேஸில் களமிறங்கும் வணங்கான்?

வணங்கான் திரைப்படத்தை வரும் பொங்கலுக்கு வெளியிட படக்குழு முடிவு செய்துள்ளதாக தகவல் வெளியாகி உள்ளது.

பாலா இயக்கத்தில் அருண் விஜய் நடித்துள்ள படம் 'வணங்கான்'. இதனை பாலாவின் பீ ஸ்டுடியோஸ் நிறுவனம் மற்றும் வி அவுஸ் புரொடக்ஷன்ஸ் என இரு நிறுவனங்கள் இணைந்து தயாரித்துள்ளனர். இதில் ரோசினி பிரகாஷ் நாயகியாக நடித்துள்ளார். சமுத்திரக்கனி, மிஷ்கின் ஆகியோர் முக்கிய கதாபாத்திரங்களில் நடித்துள்ளனர்.

இந்த படத்தின் படப்பிடிப்பு முழுவதும் நிறைவு பெற்று போஸ்ட் புரொடக்ஷன் பணிகள் கடந்த சில மாதங்களாக நடைபெற்று வருகிறது. இந்த படத்தின் ரிலீஸ் தேதியை இதுவரை படக்குழு தரப்பில் இருந்து அறிவிக்கவில்லை. இந்த நிலையில் படக்குழு படத்தை வரும் பொங்கலுக்கு திரைக்கு கொண்டு வருவதற்கான பணிகளை மேற்கொண்டு வருவதாக தகவல் வெளியாகியுள்ளது.

பொங்கலுக்கு அஜித்தின் விடாமுயற்சி மற்றும் ராம்சரணின் ‘கேம்சேஞ்சர்’ ஆகிய படங்கள் ரிலீஸாகவுள்ள நிலையில், வணங்கான் படத்தையும் துணிந்து இறக்குவது என்ற முடிவை இயக்குநர் பாலாவும், தயாரிப்பாளர் சுரேஷ் காமாட்சியும் எடுத்துள்ளதாக சொல்லப்படுகிறது. இரண்டு பெரிய படங்களுக்கு மத்தியில் வணங்கான் வெளியாக உள்ளநிலையில், வணங்கான் வசூலை அள்ளுமா என கேள்விகள் எழுந்து வருகின்றன.

விடாமுயற்சியும், கேம் சேஞ்சரும் பெரிய நடிகர்களின் படம் என்றாலும், வணங்கான் பாலாவுடைய இயக்கம் என்பதால், பொங்கலன்று வசூலை குவிப்பது எந்த படம் என்பதை பொறுத்திருந்துதான் பார்க்க வேண்டும்.