ஐபிஎல்2024 சாம்பியன் பட்டத்தை வெல்லப் போகும் அணி எது? இன்று மோதும் கொல்கத்தா - ஹைதராபாத்!

நடப்பு ஆண்டிற்கான ஐபிஎல் தொடரின் இறுதிப்போட்டி இன்று நடைபெற உள்ளது. இந்த போட்டியில் கொல்கத்தா நைட் ரைடர்ஸ் அணியும், சன்ரைசர்ஸ் ஹைதராபாத் அணியும் மோதுகின்றன. 

அனைவரும் ஆவலுடன் எதிர்பார்த்து கொண்டிருந்த ஐபிஎல்2024 மார்ச் 22-ம் தேதி தொடங்கி தற்போது இறுதி கட்டத்தை எட்டியுள்ளது. மொத்தம் 10 அணிகள் பங்கேற்ற இத்தொடரில், நடப்பு சாம்பியன்ஸான சென்னை ப்ளே ஆஃப் சுற்றுக்கு தகுதி பெறாமலேயே வெளியேறியது. இது ரசிகர்களிடையே பெரும் கவலையை ஏற்படுத்தியது. இந்நிலையில் இறுதிப்போட்டி இன்று சென்னை சேப்பாக்கத்தில் உள்ள சிதம்பரம் மைதானத்தில் நடைபெற உள்ளது.

புள்ளிப்பட்டியலில் முதல் இரண்டு இடத்தில் இருந்த கொல்கத்தாவுக்கும், ஹைதராபாத்துக்கும் கடந்த 21-ம் தேதி குவாலிபயர் 1 போட்டி நடைபெற்றது. இதில் 8 விக்கெட்டுகள் வித்தியாசத்தில் வெற்றி பெற்ற கொல்கத்தா நேரடியாக இறுதிப்போட்டிக்கு முன்னேறியது. இதில் தோல்வியை தழுவிய ஹைதராபாத், ராஜஸ்தான் அணியுடன் குவாலிபயர் 2 சுற்றில் போட்டியிட்டது. இதில் வெற்றி பெற்ற ஹைதராபாத் இறுதிப்போட்டிக்கு முன்னேறியது. 

இந்நிலையில் இன்று கொல்கத்தா நைட் ரைடர்ஸ் அணியும், சன்ரைசர்ஸ் ஹைதராபாத் அணியும் களம் காண்கின்றன. இதுவரை கொல்கத்தா அணி மூன்று முறை இறுதிப்போட்டிக்கு முன்னேறி இரண்டு முறை சாம்பியன் பட்டத்தை வென்றுள்ளது. இது பைனலுக்கு செல்லும் நான்காவது முறை. அதுபோல ஹைதராபாத் இதுவரை இரண்டு முறை பைனலுக்கு சென்றுள்ளது. இதில் ஒருமுறை மட்டுமே சாம்பியன் பட்டம் வென்றுள்ளது. இது பைனலுக்கு முன்னேறிய மூன்றாவது முறை.

ரசிகர்களிடையே எந்த அணி கோப்பையை வெல்லும் என்னும் ஆர்வம் அதிகரித்துள்ளது. இந்த சீசனில் பல ரெக்கார்டுகளை உடைத்த ஹைதராபாத் அணி கோப்பையை வெல்லுமா அல்லது தொடர்ந்து வெற்றியை பதிவு செய்து வந்த கொல்கத்தா வெல்லுமா என்பதை பொறுத்திருந்து பார்க்கலாம்.