விழுப்புரம் | பக்கிங்காம் கால்வாயில் அடித்துச் செல்லப்பட்ட 3 சகோதரர்கள் - ஒருவர் உடல் மீட்பு!

விழுப்புரம் அருகே மூவர் பக்கிங்காம் கால்வாயில் அடித்துச் செல்லப்பட்ட நிலையில் ஒருவரின் உடல் மீட்கப்பட்டுள்ளது.

விழுப்புரம் மாவட்டம் மரக்காணம் சந்தை தோப்பு பகுதியைச் சேர்ந்தவர் கணேசன். இவருக்கு லோகேஷ்(24), இரட்டை சகோதர்களான விக்ரம்(23), சூர்யா(23) ஆகிய 3 சகோதரர்கள் இருந்தனர். கணேசனின் மகன்கள் மூன்று பேரும் நேற்று மாலை கடல் முகத்துவாரப் பகுதியான பக்கிங்காம் கால்வாயில் மீன் பிடிக்க சென்றனர். சகோதரர்கள் 3 பேரும் கால்வாய் மேம்பாலத்தின் மீது அமர்ந்து மீன் பிடித்து கொண்டிருந்தனர். அப்போது எதிர்பாராத விதமாக லோகேஷ் கால்வாயில் தவறி விழுந்து வெள்ளத்தில் அடித்து செல்லப்பட்டார்.

இதனைக்கண்டு அதிர்ச்சி அடைந்த மற்ற இருவரும், அண்ணனைக் காப்பாற்ற கால்வாயில் குதித்தனர். இதில் சகோதரர்கள் 3 பேரும் வெள்ளத்தில் அடித்து செல்லப்பட்டனர். தகவலறிந்தது சம்பவ இடத்திற்கு விரைந்து வந்த போலீசாரும், தீயணைப்பு வீரர்களும் மாயமான 3 சகோதர்களையும் தேடும் பணியில் ஈடுபட்டனர்.

இந்நிலையில் நீண்ட நேர போராடத்துக்கு பிறகு லோகேஷ் என்பவரின் உடல் மீட்கப்பட்டது. தொடர்ந்து மாயமான இரட்டையர்கள் விக்ரம், சூர்யாவை தேடும் பணி தீவிரமாக நடைபெற்று வருகிறது. இச்சம்பவம் அப்பகுதியில் பெரும் சோகத்தை ஏற்படுத்தியுள்ளது.