ஓடிடியில் வெளியாகும் விக்ராந்தின் #DeepavaliBonus… எங்கு எப்போது பார்க்கலாம்?

விக்ராந்த் நடித்துள்ள 'தீபாவளி போனஸ்' திரைப்படம் நாளை ஓடிடியில் வெளியாக உள்ளது.

கடந்த 2005ம் ஆண்டு வெளியான 'கற்க கசடற' திரைப்படத்தின் மூலம் தமிழ் சினிமாவில் கதாநாயகனாக அறிமுகமானவர் விக்ராந்த். தொடர்ந்து இவர் முத்துக்கு முத்தாக, கோரிப்பாளையம், வெண்ணிலா கபடிகுழு 2, பக்ரீத், லால் சலாம் உள்ளிட்ட படங்களில் நடித்துள்ளார். சமீபத்தில் விக்ராந்த் நடிப்பில் வெளியான திரைப்படம் ‘தீபாவளி போனஸ்’. இப்படத்தை அறிமுக இயக்குநர் ஜெயபால் இயக்கியுள்ளார்.

இத்திரைப்படத்தில் ரித்விகா கதாநாயகியாக நடித்துள்ளார். ஸ்ரீ அங்காளி பரமேஸ்வரி புரொடக்‌ஷன்ஸ் சார்பில் தீபக் குமார் டாலா தயாரித்துள்ள இந்த படத்திற்கு மரிய ஜெரால்ட் இசையமைத்துள்ளார். எளிய மக்களின் வாழ்க்கை போராட்டங்களை குறிப்பாக தீபாவளி போன்ற பெரும் பண்டிகை காலங்களை கொண்டாடுவதற்காக அவர்கள் எதிர்கொள்ளும் போராட்டங்களை எடுத்துக் கூறும் வகையில் இப்படம் உருவாகியுள்ளது.

கடந்த அக்.25ம் தேதி திரையரங்குகளில் வெளியான இப்படம் ரசிகர்கள் மத்தியில் நல்ல வரவேற்பை பெற்றுள்ளது. இந்த நிலையில், இப்படத்தின் ஓடிடி ரிலீஸ் குறித்த தகவல் வெளியாகியுள்ளது. அதன்படி, இப்படம் நாளை (நவ.26) ஆஹா தமிழ் ஓடிடி தளத்தில் வெளியாக உள்ளது. விக்ராந்த் தற்போது சிவகார்த்திகேயன் நடிப்பில் உருவாகி வரும் 'எஸ்.கே 23' திரைப்படத்தில் முக்கிய கதாபாத்திரத்தில் நடித்து வருவது குறிப்பிடத்தக்கது.