அண்டார்டிகாவில் ஆயிரக்கணக்கில் பென்குயின்கள் உயிரிழப்பு... பறவைக் காய்ச்சல் காரணமா?

கடந்த மார்ச் மாதம் அண்டார்டிகா கண்டத்தில் மேற்கொள்ளப்பட்ட ஆராய்ச்சியின் அடிப்படையில், 532 அடேலி பென்குயின்கள் இறந்துவிட்டதாக ஒரு ஆராய்ச்சியாளர்கள் குழு அறிக்கை வெளியிட்டது. இதனையடுத்து ஆஸ்திரேலியாவின் ஃபெடரேஷன் பல்கலைக்கழகம் வெளியிட்ட அறிக்கை, அண்டார்டிகாவில் ஆயிரக்கணக்கான பென்குயின் இறந்திருப்பதாக தெரிவித்தது.

முதல்கட்ட ஆய்வில் பென்குயின் பெரும் இறப்புகளின் பின்னணியில் பறவைக்காய்ச்சல் வைரஸ் காரணமாக இருக்கலாம் என ஆராய்ச்சியாளர்கள் தெரிவித்தனர். ஆனால், கடந்த ஒரு சில ஆண்டுகளாகவே H5N1 இன்ஃப்ளூயன்ஸா பாதிப்புகள் அண்டார்டிகாவில் அதிகரித்து இருப்பதாக ஆராய்ச்சியாளர்கள் கண்டறிந்துள்ளனர். அதிக எண்ணிக்கையிலான பென்குயின் மரணங்களை அடுத்து அதன் பின்னணி குறித்து அறிய, அங்கிருந்து சேகரித்து வரப்பட்ட மாதிரிகள் பரிசோதனைக்காக ஆய்வகங்களுக்கு அனுப்பப்பட்டுள்ளன.ஒவ்வொரு ஆண்டும், சுமார் 2,80,000 அடேலி பென்குயின்கள் ஹெரோயினா தீவில் இனப்பெருக்கம் செய்கின்றன. அப்படி வருகை தரும் பென்குயின்கள் மத்தியில் பரவும் பறவைக்காய்ச்சல் அச்சுறுத்தல் அவற்றின் பல்லாயிரம் உயிர் பலிகளுக்கு காரணமாக இருக்கக்கூடும் என அஞ்சப்படுகிறது. அண்டார்டிக் தீபகற்பம் மற்றும் அருகிலுள்ள மூன்று தீவுகளில் பறவைக் காய்ச்சல் தொற்று உறுதி செய்யப்பட்டுள்ளது. பென்குயின் முட்டைகள் மற்றும் குஞ்சுகளை உண்ணும் ஸ்குவா கடற்பறவைகளில் இந்த பறவைக் காய்ச்சலின் திரிபு கண்டறியப்பட்டுள்ளது.