3வதும் பெண் குழந்தை... மனைவியை தீ வைத்து எரித்த கணவர் கைது!

மகாராஷ்டிராவில் மூன்றாவதும் பெண் குழந்தை பிறந்ததால், மனைவியை தீவைத்து எரித்த கணவரை போலீசார் கைது செய்தனர்.

மகாராஷ்டிர மாநிலம் பர்பானி மாவட்டத்தின் கங்காகேட் நாகாவை சேர்ந்தவர் குண்ட்லிக் உத்தம் காலே (32 வயது). இவரது மனைவி மைனா குண்ட்லிக். இவர்களுக்கு 6 வயதில் ஒரு மகளும், 4 வயதில் ஒரு மகளும் உள்ளனர். இந்நிலையில் மூன்றாவதும் பெண் குழந்தை பிறந்துள்ளது. இதனால் மனைவியிடம் காலே அடிக்கடி சண்டை போட்டு வந்துள்ளார்.

இந்நிலையில் கடந்த வியாழன்கிழமையன்றும் இதுதொடர்பாக வாக்குவாதம் நடந்துள்ளது. அப்போது குண்ட்லிக் உத்தம் காலே, மைனாமீது பெட்ரோலை ஊற்றி தீ வைத்துள்ளார். இதனால் அலறியடித்துக்கொண்டு மைனா வீட்டை விட்டு வெளியே ஓடினார். அருகில் இருந்தவர்கள் தீயை அணைத்து மைனாவை மருத்துவமனைக்கு கொண்டு சென்றுள்ளனர். ஆனால் செல்லும் வழியிலேயே அவர் உயிரிழந்துள்ளார். இதுதொடர்பாக மைனாவின் சகோதரி கங்காகேட் காவல் நிலையத்தில் புகார் அளித்துள்ளார். இதனையடுத்து கொலை வழக்கில் காலே கைது செய்யப்பட்டார்.