“அதிமுக ஆட்சியின் திட்டங்களும் சிறப்பாக செயல்படுத்துகிறது” - பேதம் பார்க்கும் பண்பு இல்லை என திமுக அறிக்கை!
அதிமுக ஆட்சியின் திட்டங்களை திமுக மேலும் சிறப்பாக செயல்படுத்துவதாகவும், பேதம் பார்க்கும் பண்பு திமுகவிடம் இல்லை எனவும் அக்கட்சியின் சார்பில் அறிக்கை வெளியிடப்பட்டுள்ளது.
இதுகுறித்து வெளியிடப்பட்டுள்ள அறிக்கையில்,
“திமுகவின் ஆட்சியைக் குறைகூறி தமிழ்நாட்டின் எதிர்க்கட்சித் தலைவர் சில செய்திகளைச் சொல்லி வருகிறார். அதிலும், அதிமுக நிறைவேற்றிய திட்டங்களை திமுக அரசு நிறுத்திவிட்டது. குறிப்பாக அதிமுக ஆட்சியின் திட்டத்தை மூடிவிட்டது என்றெல்லாம் குறை சொல்லியுள்ளார். எதிர்க்கட்சித் தலைவர் அம்மா உணவுத் திட்டம் குறித்துக் கூறியுள்ளார். மக்களுக்கு உண்மை தெரிய வேண்டும் என்பதற்காகச் சில விளக்கங்களை இங்கே குறிப்பிடுகிறோம். 2021 தேர்தலில் வென்று திமுக ஆட்சிக்கு வந்ததால், அம்மா உணவு திட்டத்தை உடனே மூடிவிடுவார்கள் என்று கூறினார்கள். அவர்கள் சொல்லியதுபோல் அத்திட்டம் மூடப்படவில்லை. கடந்த மூன்றாண்டுகளில் திமுக, அம்மா உணவுத் திட்டத்திற்கு ரூ.250 கோடி நிதி ஒதுக்கீடு செய்து சிறப்பாக நிறைவேற்றி வருகிறது.
கடந்த ஜூலை 19-ம் தேதி சென்னை தேனாம்பேட்டையில் உள்ள “அம்மா உணவகத்திற்கு” நேரில் சென்று பார்வையிட்ட முதலமைச்சர், அங்குச் சமைக்கப்பட்டிருந்த உணவை எடுத்துச் சாப்பிட்டு உணவுப் பொருள்கள் குறித்து ஆய்வு செய்தார். அதனைத் தொடர்ந்து அம்மா உணவகங்களில் சிதைந்த உணவு பாத்திரங்களுக்குப் பதிலாகப் புதிய பாத்திரங்கள் வாங்கிடவும், அம்மா உணவகங்ளுக்குத் தேவையான பணிகளுக்காகவும் உடனடியாக ரூ.21 கோடி நிதி ஒதுக்கீடு செய்து உத்தரவிட்டார்.
இதற்கு மேலும் சில சான்றுகள்: எம்ஜிஆரின் சத்துணவு திட்டத்தில் 5 முட்டைகள் வழங்கிய திமுக. 1982ஆம் ஆண்டில் எம்ஜிஆர் அறிமுகப்படுத்திய திட்டம், பள்ளிக் குழந்தைகளுக்குச் சத்துணவு வழங்கும் திட்டம். எம்ஜிஆர் ஆட்சி முடிந்து, குடியரசுத் தலைவர் ஆட்சியும் முடிந்து தமிழ்நாட்டில் 1989இல் நடைபெற்ற தேர்தலில் திமுக வென்று கருணாநிதி ஆட்சிக்கு வந்தார். அம்மா உணவுத் திட்டத்தை மூடிவிடும் திமுக ஆட்சி என்று சொல்வதுபோல், அப்போதும் திமுக சத்துணவுத் திட்டத்தை மூடிவிடும் என்று சிலர் சொன்னார்கள். ஆனால் திமுக அப்பொழுது சத்துணவு திட்டத்தில் 1989இல் இரண்டு வாரங்களுக்கு ஒரு முட்டை சேர்த்து சத்துணவு திட்டத்தைப் பள்ளிக் குழந்தைகளுக்குச் சத்தான திட்டமாக வழங்கியது.
1996இல் நான்காவது முறையாக கருணாநிதி தலைமையில் திமுக ஆட்சி மீண்டும் அமைந்தது. அந்தக் காலகட்டத்தில் சத்துணவுடன் குழந்தைகளுக்கு வாரம் 5 முட்டைகள் வழங்கி அத்திட்டத்திற்கு மேலும் சிறப்புச் சேர்த்தவர் கருணாநிதி. இலவச சைக்கிள் வழங்கும் திட்டத்தை விரிவுபடுத்தியது திமுக. அதிமுக ஆட்சிக் காலத்தில் 27.7.2001 அன்று பிறப்பிக்கப்பட்ட அரசாணையின்படி அரசுப் பள்ளிகளில் பதினொன்றாம் வகுப்பு பயிலும் ஆதிதிராவிட பழங்குடியின மாணவ, மாணவியர்களுக்கு இலவச மிதிவண்டிகள் வழங்கும் திட்டம் நடைமுறைப்படுத்தப்பட்டது. இந்தத் திட்டம் பள்ளி மாணவ, மாணவியருக்கு மட்டுமல்லாமல் அவர்களின் குடும்பத்தாருக்கும் பயனளிக்கும் திட்டம் என திமுக கருதியது.
அதனால், அதிமுக கொண்டு வந்த திட்டம் என எண்ணாமல் 2006இல் ஆட்சிக்கு வந்த திமுக 2006-2007 முதல் 5 ஆண்டுகளிலும் திமுக ஆட்சியில் ஆதிதிராவிடர்- தாழ்த்தப்பட்டோர் மலைவாழ் இனத்தினர், பிற்படுத்தப்பட்டோர், மிகப்பிற்படுத்தப்பட்டோர், சீர்மரபினர் உட்பட இதர பல வகுப்புகளைச் சார்ந்தவர்களுக்கும் விரிவுபடுத்தி 19 லட்சத்து 54 ஆயிரத்து 627 மாணவ மாணவியர்க்கு 465 கோடியே 91 லட்சம் ரூபாய்ச் செலவில் இலவச மிதி வண்டிகள் வழங்கப்பட்டன என்பது வரலாறு.
அந்த நூலகம் திருமண மண்டபமாக - குழந்தைகள் மருத்துவமனையாக மாற்றப்படும் என அறிவித்து நடைமுறைக்கும் கொண்டுவர ஆணைகள் பிறப்பித்தது அதிமுக ஆட்சி.
ஆனால், சென்னை உயர்நீதிமன்றம் குறுக்கிட்டு பல கட்டங்களாக விசாரணைகள் மேற்கொண்டு அறிவுரைகள் வழங்கிய பிறகும் முறையாக அண்ணா நூற்றாண்டு நூலகம் செயல்பட அதிமுக ஆட்சி அனுமதிக்காத நிலையில் உயர்நீதிமன்றத் தலைமை நீதிபதி எஸ்.கே.கவுல், டி.எஸ்.சிவஞானம் இருவரும், “31.10.2016ல் அண்ணா நூலகத்தில் அனைத்துப் பணிகளையும் செய்து முடித்து 4.11.2016 அன்று அறிக்கை தாக்கல் செய்ய வேண்டும்; இல்லையேல், நீதிமன்றமே ஒரு குழு அமைத்து அண்ணா நூலகத்தைப் பராமரித்திட நேரிடும்” என்று அதிமுக அரசுக்கு எச்சரிக்கை விடுத்ததன் காரணமாக - நீதிமன்றத்தின் கெடுபடியால் அண்ணா நூற்றாண்டு நூலகத்தைச் செயல்பட வைத்தது.
புதிய தலைமைச் செயலகம் பட்ட பாடு: புனித ஜார்ஜ் கோட்டை தலைமைச் செயலகத்தின் இடநெருக்கடிக்கு நிரந்தரத் தீர்வு காண ஓமந்தூரார் அரசினர் தோட்ட வளாகத்தில் 1,000 கோடியில் நிர்மாணித்து பிரதமர் மன்மோகன் சிங் வருகைதந்து திறந்து வைத்த புதிய சட்டமன்ற - தலைமைச் செயலகக் கட்டடத்தை மீண்டும் திமுக ஆட்சி வந்தால்கூடப் பயன்படுத்தி விடக்கூடாது என்ற வக்கிர நோக்கத்துடன், அந்தக் கட்டடத்தின் உட்பகுதிகளை மாற்றி அமைத்து ஓமந்தூரார் மருத்துவமனையாக மாற்றினார்கள்.
வள்ளுவர் கோட்ட மாண்பைச் சிதைத்த அதிமுக: உலக மக்கள் நலன்நாடி சாதி, மத, இன, மொழிக் கட்டுக்குள் அடங்காமல் மனிதநேயம் ஒன்றையே குறிக்கோளாகக் கொண்டு 1330 அருங்குறட்பாக்களைப் பாடிய அய்யன் திருவள்ளுவர் புகழ்போற்றி சென்னை மாநகரில் திமுக, ஆட்சிக் காலத்தில் 1974-ம் ஆண்டில் கருணாநிதியால் கட்டப்பட்ட வள்ளுவர் கோட்டத்தை முறையாகப் பராமரிக்காமல், சிதைத்தார்கள். அது மட்டுமல்ல; இழிவான செயல்கள், ஒழுங்கீனங்கள் அங்கு நடைபெறச் செய்தார்கள்.
அப்படிக் கட்டப்பட்ட மேம்பாலப் பணிகள் விரைவாக நடைபெற்று வந்த வேளையில் 2011 இல் அதிமுக ஆட்சிக்கு வந்தவுடன் அந்தத் திட்டத்திற்குத் தடை போட்டார்கள். இன்றும் அவர்களின் பொறாமை உணர்வைப் புலப்படுத்தும் அடையாளங்களாகக் கூவம் ஆற்றுக் கரையோரங்களிலும், கோயம்பேடு முதல் மதுரவாயல் வரை பூந்தமல்லி நெடுஞ்சாலையிலும் 13 ஆண்டுகளாக நின்று கொண்டிருக்கும் பிரம்மாண்டமான தூண்கள் சொல்லும் கதையை மறந்து விட்டாரா எதிர்க்கட்சித் தலைவர்!
பண்பாட்டுச் சின்னம் கண்ணகி சிலையை அகற்றினீர்களே : பேரறிஞர் அண்ணா காலத்தில் கொண்டாடப்பட்ட இரண்டாம் உலகத் தமிழ் மாநாட்டின்போது சென்னை கடற்கரையில் கருணாநிதி வழங்கி நிறுவப்பட்ட தமிழனின் பண்பாட்டுச் சின்னம் கண்ணகி சிலையை இரவோடு இரவாகக் கடத்தி லாரி மோதி விட்டது எனக் கதை கட்டி அருங்காட்சியகத்தில் கொண்டுபோய்க் கிடத்தினீர்கள்.
கலைத் தொண்டுகளினால் தமிழ்நாட்டிற்கு உலகப்புகழ் சேர்த்த நடிகர் சிவாஜி கணேசனுக்கு முன்னாள் முதலமைச்சர் கருணாநிதி கடற்கரைச் சாலையில் நிறுவிய அகற்றியதும் நீங்கள்தானே! 10,000 சாலைப் பணியாளர்கள் வாழ்வைக் குலைத்தவர்கள்
10,000 குடும்பங்களை வாழவைக்க கருணாநிதி 10,000 சாலைப் பணியாளர்களை 1998-ம் ஆண்டில் நியமித்தார். 2001-ல் அமைந்த அதிமுக ஆட்சி அத்தனை பேரையும் பதவி நீக்கம் செய்தது. அவர்கள் உண்ணாவிரதப் போராட்டம் நடத்தியும், நீதிமன்றங்களை நாடியும் மீண்டும் நியமனம் செய்யப்படவேண்டும் என்று போராடியும் சாலைப்பணியாளர் குடும்பங்களை வாழவிடாமல் அவர்களில் பலரை சாகவிட்டது அதிமுக ஆட்சி.
செம்மொழிப் பூங்காவை சிதைத்தவர்களா பேசுவது?: 150 ஆண்டுகளுக்கு மேலாக அறிஞர் கால்டுவெல் முதன்முதல் கூறி, தொடர்ந்து பல அறிஞர்கள் கோரிக்கைகள் வைத்தும் எவராலும் நிறைவேற்றப்படாத தமிழ் செம்மொழி கோரிக்கையை ஒன்றிய அரசை வலியுறுத்தி 2005-ம் ஆண்டில் சோனியா காந்தியின் ஒத்துழைப்போடு அன்னை தமிழ்மொழிக்குச் செம்மொழி என்னும் சிறப்பைப் பெற்றுத் தந்த வெற்றியின் அடையாளமாக 2010 ஜுன் திங்களில் கோவை மாநகரில் கொண்டாடிய உலகத் தமிழ்ச் செம்மொழி மாநாட்டினைத் தொடர்ந்து, அந்தச் செம்மொழி வெற்றியின் மற்றொரு நினைவுச் சின்னமாக சென்னை அண்ணா மேம்பாலத்திற்கு அருகில் பல ஆண்டுகளாகத் தனியார் ஆக்கிரமிப்பிலிருந்த நூற்றுக் கணக்கான ஏக்கர் நிலங்களை மீட்டு, அங்கு அமைத்த செம்மொழிப் பூங்காவைச் சிதைத்தது அதிமுக ஆட்சி தான்.
அதேபோல அடையாற்றின் அருகே கிரீன்வேஸ் சாலைப் பகுதியில் திமுக ஆட்சிக் காலத்தில் கருணாநிதி அமைத்திருந்த தொல்காப்பியர் பூங்காவை உருக்குலைத்ததும் அதிமுக ஆட்சிதான். இவை மட்டுமல்ல, திமுக கொண்டு வந்த, நமக்கு நாமே திட்டம், நடைமுறைப்படுத்திய, அண்ணா மறுமலர்ச்சி திட்டம், சமத்துவபுரத் திட்டம், உழவர் சந்தை திட்டம், மக்கள் பிரச்சனைகளை தீர்த்த, மனுநீதி திட்டம், கலைஞர் காப்பீட்டுத் திட்டம், சமச்சீர் கல்வி திட்டம், மினி பஸ் திட்டம், முதலான திட்டங்களையெல்லாம் சிதைத்தது யார் என்பதையும் மறந்து விட்டாரா எதிர்க்கட்சித்லைவர்!
செய்ததெல்லாம் திமுக ஆட்சி! சீர்குலைத்ததெல்லாம் அதிமுக ஆட்சி! அதனால்தான் திமுக மக்களின் மகத்தான ஆதரவுடன் கட்டுக்கோப்பாக வளர்ந்து இன்றும் செழித்து நிற்கிறது. தொடர்ந்து மக்களுக்குத் தொண்டாற்றி வெற்றி மேல் வெற்றி பெற்று வருகிறது.
அதனால்தான், அதிமுக சிதைந்து சின்னாபின்னமாகி – இடைத் தேர்தலில் கூட போட்டியிடத் துணிவில்லாமல் ஓடி ஒளிந்து கொள்ள வேண்டிய அவலநிலைக்கு ஆளாகிப் பிதற்றிக் கொண்டுள்ளது.
சமூகநீதி - சாதி, மத, பேதம் நீங்கிடும் சமத்துவச் சிந்தனைகளைத் தந்து தமிழ்நாட்டை வளர்த்தெடுத்து இந்திய அளவில் - சமதர்மச் செங்கோல் ஏந்தி சமூக நீதியைச் செழிக்கச் செய்த கருணாநிதி. தமிழ்நாட்டை இந்தியாவின் முன்னணி மாநிலமாக உயர்த்தி வருகிறார் முதலமைச்சர் மு.க.ஸ்டாலின்.
ஏமாற்றாதே ஏமாறாதே என்று எம்ஜிஆர் சொல்லெடுத்துக் கூறி, கவிஞர் வாலி எழுதி, அடிமைப்பெண் படத்தில் எம்ஜிஆர் பாடுவது போல் அமைந்த பாடலின் தொடர்களையே நினைவுபடுத்துகிறோம். ஏமாற்றாதே ஏமாற்றாதே! ஏமாறாதே ஏமாறாதே!”
இவ்வாறு தெரிவிக்கப்பட்டுள்ளது.