இந்தியப் பெருங்கடலில் 'கள்ளக் கடல்' நிகழ்வு... கடலோர பகுதி மக்களுக்கு எச்சரிக்கை!

‘கள்ளக்கடல்' நிகழ்வு என்பது எவ்வித அறிகுறிகளும் இன்றி திடீரென கடல் சீற்றம் அடைவது. சற்று எதிர்பாராத தருணத்தில் இந்த நிகழ்வு நடைபெறும் என்பதால் கேரளாவில் இதனை, ’கள்ளக்கடல்’ நிகழ்வு என அழைக்கின்றனர். இந்தியப் பெருங்கடலின் தெற்குப் பகுதியில் சில நேரங்களில் திடீரென எந்தக் குறிப்பும்,  எச்சரிக்கையும் இன்றி ஏற்படும் பலத்த காற்றின் விளைவே இப்படி ‘கள்ளக்கடல்’ நிகழ்வு உருவாகக் காரணமாகும்.

இந்நிலையில் இன்றும் (மே 4) நாளையும் (மே 5) இந்த கள்ளக்கடல் நிகழ்வு ஏற்பட வாய்ப்புள்ளதால் தமிழ்நாட்டில்,  கடல் கொந்தளிப்புடன் இருக்கும் என இந்திய கடல்சார் தகவல் மையம் எச்சரிக்கை விடுத்துள்ளது.  இதன் காரணமாக கன்னியாகுமரி, திருநெல்வேலி, ராமநாதபுரம் மற்றும் தூத்துக்குடி மாவட்ட கடலோரப் பகுதிகளில் கடல் அலையின் சீற்றம் அதிகமாக இருக்கும். கடல் கொந்தளிப்புடன் காணப்படும் என எச்சரிக்கை விடுக்கப்பட்டுள்ளது.  மேலும் இதன் காரணமாக சிவப்பு நிற எச்சரிக்கை விடுக்கப்பட்டுள்ளது.