டி20 உலகக்கோப்பை - அமெரிக்காவுக்கு எதிராக டாஸ் வென்ற இந்திய அணி பந்துவீச்சு தேர்வு!

டி20 உலகக்கோப்பை தொடரின் 23வது லீக் போட்டியில் டாஸ் வென்ற இந்திய அணி பந்துவீச்சை தேர்வு செய்துள்ளது.  

ஒன்பதாவது டி20 உலகக்கோப்பை கிரிக்கெட் போட்டி அமெரிக்கா மற்றும் வெஸ்ட் இண்டீசில் நடைபெற்று வருகிறது. இதில் பங்கேற்றுள்ள 20 அணிகள் 4 பிரிவுகளாக பிரிக்கப்பட்டுள்ளன. ஒவ்வொரு அணியும் தங்கள் பிரிவில் உள்ள மற்ற அணிகளுடன் தலா ஒரு முறை மோத வேண்டும். லீக் முடிவில் ஒவ்வொரு பிரிவிலும் முதல் இரு இடங்களை பிடிக்கும் அணிகள் சூப்பர் 8 சுற்றுக்கு முன்னேறும். இதுவரை 22 லீக் போட்டியில் முடிந்துவிட்ட போதிலும் எந்த அணியும் சூப்பர் 8 சுற்றை இன்னும் உறுதி செய்யவில்லை.

இந்நிலையில் இந்தியா, அமெரிக்கா அணிகள் இன்று நியூயார்க்கில் மோதுகின்றன. டாஸ் வென்ற இந்திய அணி பவுலிங் தேர்வு செய்தது. அதன்படி அமெரிக்கா முதலில் பேட்டிங் செய்கிறது. ரோகித் சர்மா தலைமையிலான இந்தியா தனது முதல் இரு ஆட்டங்களில் அயர்லாந்து மற்றும் பாகிஸ்தானை வீழ்த்தி உள்ளது. மோனக் பட்டேல் தலைமையிலான அமெரிக்க அணி தொடக்க ஆட்டத்தில் 7 விக்கெட் வித்தியாசத்தில் கனடாவையும்,  அடுத்த ஆட்டத்தில் சூப்பர் ஓவரில் பாகிஸ்தானையும் வீழ்த்தியது. சர்வதேச கிரிக்கெட்டில் இந்தியா – அமெரிக்கா நேருக்கு நேர் மோதுவது இதுவே முதல்முறையாகும்.