டி20 போட்டி | ஜிம்பாப்வே அணியை வீழ்த்தி பாகிஸ்தான் அபார வெற்றி!

ஜிம்பாப்வே அணி எதிரான முதல் டி20 போட்டியில் பாகிஸ்தான் 57 ரன்கள் வித்தியாசத்தில் வெற்றி பெற்றுள்ளது.

ஜிம்பாப்வேவுக்கு சுற்றுப்பயணம் மேற்கொண்டுள்ள பாகிஸ்தான் கிரிக்கெட் அணி தலா 3 போட்டிகள் கொண்ட ஒருநாள் மற்றும் டி20 தொடர்களில் விளையாடுகிறது. இதில் ஒருநாள் தொடரை 2-1 என்ற கணக்கில் பாகிஸ்தான் கைப்பற்றியது . இந்நிலையில் இரு அணிகளுக்கும் இடையேயான முதல் டி20 போட்டி இன்று நடைபெற்றது. இந்த போட்டிக்கான டாஸ் போடப்பட்டது.

அதில் டாஸ் வென்ற பாகிஸ்தான் அணியின் கேப்டன் சல்மான் ஆகா பேட்டிங்கை தேர்வு செய்தார். அதன்படி பாகிஸ்தான் அணி முதலில் பேட்டிங் செய்தது . தொடக்கம் முதல் பாகிஸ்தான் அணி சிறப்பாக விளையாடியது. இதனால் 20 ஓவர்கள் முடிவில் 4 விக்கெட் இழப்பிற்கு பாகிஸ்தான் அணி 165 ரன்கள் எடுத்தது. பாகிஸ்தான் அணியில் உஸ்மான் கான் , தயப் தாஹிர் ஆகியோர் தலா 39 ரன்கள் எடுத்தனர். தொடர்ந்து 166 ரன்கள் இலக்குடன் ஜிம்பாப்வே அணி விளையாடியது.

இதையும் படியுங்கள் : கனமழை எதிரொலி | சென்னை பல்கலைக்கழக தேர்வுகள் ஒத்திவைப்பு!

பாகிஸ்தான் அணியின் பந்துவீச்சை சமாளிக்க முடியாமல் ஜிம்பாப்வே அணி அடுத்தடுத்து விக்கெட்டுகளை இழந்தது . இதனால் 15.3 ஓவர்களில் 108 ரன்களுக்கு ஜிம்பாப்வே ஆட்டமிழந்தது. அந்த அணியில் கேப்டன் சிக்கந்தர் ராசா மட்டும் நிலைத்து ஆடி 39 ரன்கள் எடுத்தார். பாகிஸ்தான் சார்பில் அபிரார் அகமது, சுபியான் முகீம் ஆகியோர் தலா 3 விக்கெட்டுகள் வீழ்த்தினர். இதனால் பாகிஸ்தான் அணி 57 ரன்கள் வித்தியாசத்தில் அபார வெற்றி பெற்றது . இந்த வெற்றியால் 3 போட்டிகள் கொண்ட டி20 தொடரில் பாகிஸ்தான் 1-0 என முன்னிலை பெற்றுள்ளது.