பிஸ்கெட், மிக்சர், தண்ணீர் | #TVK தொண்டர்களுக்கு தயாராகும் 8.5 லட்சம் சிற்றுண்டி கிட்கள்!

பிஸ்கெட், ஸ்நாக்ஸ், தண்ணீர் பாட்டில் அடங்கிய சிற்றுண்டி தொகுப்பை மாநாட்டிற்கு வரும் தொண்டர்களுக்கு வழங்க தவெகவினர் தயார் செய்து வருகின்றனர்.

தமிழக வெற்றிக் கழகத்தின் முதல் மாநாடு நாளை விழுப்புரம், விக்கிரவாண்டியில் நடைபெற உள்ளது. முதல் மாநாட்டிற்கான பணிகள் தீவிரமாக நடைபெற்று வருகிறது. நாளை மாநாடு நடைபெற உள்ள நிலையில், பலரும் இன்றே ஆயத்தமாக தொடங்கியுள்ளனர். சென்னை தாம்பரத்திலிருந்து மாநாடு நடைபெறும் பகுதி வரைக்கும் வழிநெடுக பேனர்களை தொண்டர்கள் வைத்திருக்கிறார்கள்.

தலைவர்களின் பேனர், பந்தல் என ஒருபுறம் பரபரப்பாகப் பணிகள் நடந்து கொண்டிருக்க மாநாட்டுக்கு வரவிருக்கும் தொண்டர்களுக்குக் கொடுப்பதற்காகச் சிற்றுண்டி மற்றும் தண்ணீர் பாட்டில்களையும் தவெகவினர் விறுவிறுப்பாகத் தயார் செய்து வருகிறார்கள். பிஸ்கெட், ஸ்நாக்ஸ், தண்ணீர் பாட்டில் அடங்கிய சிற்றுண்டி கிட்டை தொண்டர்களுக்கு வழங்கவிருக்கிறார்கள். மொத்தமாக 8.5 லட்சம் சிற்றுண்டி கிட்கள் தொண்டர்களுக்காகத் தயாராகி வருகிறது.

மாநாட்டு திடலில் உணவு வழங்கப்படாமல் மாற்று ஏற்பாடு செய்யப்பட்டுள்ள நிலையில், அவ்வப்போது சாப்பிட இந்த ஏற்பாட்டை மேற்கொண்டு வருகின்றனர்.