விஜய் பட இயக்குநருடன் இணையும் #Sivakarthikeyan? வெளியான தகவல்!

எச். வினோத் இயக்கத்தில் சிவகார்த்திகேயன் நடிக்க இருப்பதாக தகவல் வெளியாகியுள்ளது.

சிவகார்த்திகேயனின் ‘அமரன்’ திரைப்படம் தீபாவளி ரிலீசாக அக்.31-ம் தேதி வெளியாகி நல்ல வரவேற்பை பெற்று வருகிறது. இப்படத்தை ராஜ்குமார் பெரியசாமி இயக்கியுள்ளார். இப்படத்தில் சாய் பல்லவி கதாநாயகியாக நடிக்க ஜி.வி. பிரகாஷ் குமார் இசையமைத்திருந்தார். மறைந்த முன்னாள் ராணுவ வீரர் மேஜர் முகுந்த் வரதராஜனின் வாழ்க்கையைத் தழுவி இப்படம் உருவாகியுள்ளது. இதில் சிவகார்த்திகேயன் மேஜர் முகுந்த் வரதராஜனாக நடித்துள்ளார். இப்படம் வெளியான 15 நாட்களில் உலகளவில் ரூ.250 கோடிக்கும் மேல் வசூலித்துள்ளதாக கூறப்படுகிறது.

அதே சமயம் ஏ.ஆர். முருகதாஸ் இயக்கத்தில் சிவகார்த்திகேயன் தனது 23வது திரைப்படத்தில் நடித்து வருகிறார். மேலும் சிபி சக்கரவர்த்தி, வெங்கட் பிரபு, சுதா கொங்கரா ஆகியோரின் இயக்கத்தில் தனது அடுத்தடுத்த படங்களில் நடிக்க உள்ளார். இந்த நிலையில், எச்.வினோத் இயக்கத்தில் சிவகார்த்திகேயன் நடிக்க உள்ளதாக தகவல் வெளியாகியுள்ளது. எச்.வினோத் தற்போது நடிகர் விஜயின் 'தளபதி 69' படத்தை இயக்கி வருகிறார்.

விஜய்யின் கடைசி படம் இது என்பதால் ஒட்டுமொத்த சினிமாவின் எதிர்பார்ப்பும் தளபதி 69 படத்தின் மீது உள்ளது. இதற்கிடையே, சிவகார்த்திகேயனிடம் ஒன்லைன் ஸ்டோரி ஒன்றை இயக்குநர் எச்.வினோத் கூறி உள்ளாராம். அந்த கதை சிவகார்த்திகேயனுக்கு பிடித்ததால் உடனே ஓகே சொல்லிவிட்டாராம். சிவகார்த்திகேயன் சமீபத்தில் எச்.வினோத்தை சந்தித்து அவருடன் இணைந்து படம் பண்ணுவதற்கான பேச்சுவார்த்தையைத் தொடங்கியுள்ளதாக சொல்லப்படுகிறது. ஆகையால் அடுத்த வருடம் இந்த படம் தொடங்குவதற்கான அதிக வாய்ப்பு இருப்பதாக கூறப்படுகிறது.