மூன்றே நாட்களில் ரூ.500 கோடியை அள்ளிய 'புஷ்பா 2'!

புஷ்பா 2 திரைப்படம் வெளியான 3 நாட்களில் உலகளவில் 500 கோடி வசூலித்துள்ளதாக படக்குழு அறிவித்துள்ளது.

நடிகர் அல்லு அர்ஜுன் நடிப்பில் சுகுமார் இயக்கத்தில் கடந்த 2021-ம் ஆண்டு வெளியான 'புஷ்பா தி ரைஸ்' படம் மிகப்பெரிய வெற்றி பெற்றது. அதனை தொடர்ந்து பிரம்மாண்ட பொருட்செலவில் உருவான 'புஷ்பா 2 தி ரூல்' திரைப்படம் கடந்த 5-ந் தேதி வெளியானது. இந்த படம் வசூல் ரீதியாகவும் ,விமர்சனம் ரீதியாகவும் நல்ல வரவேற்பை பெற்றுள்ளது .

இந்த படத்தில் ராஷ்மிகா மந்தனா, பகத் பாசில் ஆகியோர் முக்கிய கதாபாத்திரங்களில் நடித்துள்ளனர். இப்படத்தை மைத்திரி மூவி மேக்கர்ஸ் தயாரிக்க, தேவி ஸ்ரீ பிரசாத் இசையமைத்திருந்தார். மேலும் சாம் சி எஸ் இப்படத்திற்கு பின்னணி இசை அமைத்திருந்தார். தமிழ், தெலுங்கு, இந்தி உள்ளிட்ட மொழிகளில் பான் இந்தியா படமாக உலகம் முழுவதும் வெளியான இப்படம் முதல் நாளில் மட்டும் உலக அளவில் ரூ.250 கோடி வசூலை அள்ளியது. இந்தியாவில் ரூ.170 கோடிக்கு மேல் வசூலித்து உள்ளது.

இந்த நிலையில் இப்படத்தின் தற்போதைய வசூல் குறித்த தகவல் வெளியாகி உள்ளது. அதன்படி, இப்படம் வெளியான மூன்று நாட்களில் உலக அளவில் சுமார் ரூ.500 கோடி வசூலித்துள்ளதாக படக்குழு அறிவித்துள்ளது. இப்படத்தின் முதல் நாள் வசூல் "பாகுபலி 2, கேஜிஎப் 2 மற்றும் ஜவான்" ஆகிய படங்களின் வசூல் சாதனையை பின்னுக்கு தள்ளியது குறிப்பிடத்தக்கது.