#ProKabaddiLeague | தமிழ் தலைவாஸ் - பெங்களூரு புல்ஸ் அணிகள் இன்று மோதல்!

புரோ கபடி லீக் போட்டியின் இன்றைய ஆட்டத்தில் புனேரி பால்டன் – குஜராத் ஜெயண்ட்ஸ், தமிழ் தலைவாஸ் - பெங்களூரு புல்ஸ் அணிகள் மோதுகின்றன.

11-வது புரோ கபடி லீக் போட்டி ஐதராபாத்தில் கடந்த 18ம் தேதி தொடங்கியது. இதில் பங்கேற்றுள்ள 12 அணிகள் தங்களுக்குள் தலா 2 முறை மோத வேண்டும். லீக் சுற்று முடிவில் முதல் 6 இடங்களை பிடிக்கும் அணிகள் ‘பிளே-ஆப்’ சுற்றுக்கு தகுதி பெறும். லீக்கில் ‘டாப்-2’ இடங்களை வசப்படுத்தும் அணிகள் நேரடியாக அரையிறுதிக்குள் அடியெடுத்து வைக்கும். 3 முதல் 6 இடங்களை பெறும் அணிகள் வெளியேற்றுதல் சுற்றில் மோதி அதில் வெற்றி பெறும் 2 அணிகள் அரையிறுதிக்கு தகுதி பெறும்.

இந்த தொடரில் இன்று (நவ.4) நடைபெறும் முதல் லீக் ஆட்டத்தில் புனேரி பால்டன் – குஜராத் ஜெயண்ட்ஸ் அணிகள் மோதுகின்றன. புனேரி பால்டன் அணி நேற்று நடைபெற்ற ஆட்டத்தில் யு மும்பா அணியை வீழ்த்தி வெற்றி பெற்றது. இந்த வெற்றி முனைப்புடன் புனேரி பால்டன் அணி இன்று களமிறங்கும். இந்த போட்டி இன்று இரவு 8 மணிக்கு தொடங்கும். புனோரி பால்டன் அணி பாயிண்ட்ஸ் டேபிளில் முதல் இடத்திலும், குஜராத் ஜெயண்ட்ஸ் 11 வது இடத்திலும் உள்ளன.

இதனையடுத்து, 9 மணியளவில் நடைபெறும் ஆட்டத்தில் பாயிண்ட்ஸ் டேபிளில் 2வது இடத்தில் உள்ள தமிழ் தலைவாஸ், கடைசி (12வது) இடத்தில் உள்ள பெங்களூரு புல்ஸ்
அணியுடன் மோத உள்ளது. 5 போட்டிகளில் 3 முறை வெற்றி பெற்று பாயிண்ட்ஸ் டேபிளில் 2வது இடத்தில் உள்ள தமிழ் தலைவாஸ் அணி இன்று நடைபெறும் ஆட்டத்திலும் வெற்றி பெறுமா என ரசிகர்கள் ஆவலும் எதிர்பார்த்து வருகின்றனர்.