#ProKabaddiLeague | குஜராத் ஜெயண்ட்ஸை வீழ்த்தி தமிழ் தலைவாஸ் அபார வெற்றி!

புரோ கபடி லீக் போட்டியின் நேற்றைய ஆட்டத்தில் குஜராத் ஜெயண்ட்ஸை வீழ்த்தி தமிழ் தலைவாஸ் அணி அபார வெற்றி பெற்றது.

11-வது புரோ கபடி லீக் போட்டி ஹைதராபாத்தில் கடந்த 18ம் தேதி தொடங்கியது. இதில் பங்கேற்றுள்ள 12 அணிகள் தங்களுக்குள் தலா 2 முறை மோத வேண்டும். லீக் சுற்று முடிவில் முதல் 6 இடங்களை பிடிக்கும் அணிகள் ‘பிளே-ஆப்’ சுற்றுக்கு தகுதி பெறும். லீக்கில் ‘டாப்-2’ இடங்களை வசப்படுத்தும் அணிகள் நேரடியாக அரையிறுதிக்குள் அடியெடுத்து வைக்கும். 3 முதல் 6 இடங்களை பெறும் அணிகள் வெளியேற்றுதல் சுற்றில் மோதி அதில் வெற்றி பெறும் 2 அணிகள் அரையிறுதிக்கு தகுதி பெறும்.

இந்த தொடரின் முதற்கட்ட லீக் ஆட்டங்கள் ஹைதராபாத்தில் நடந்து முடிந்தன. இதனையடுத்து தொடரின் 2வது கட்ட லீக் ஆட்டங்கள் நொய்டாவில் நடைபெற்று வருகின்றன. இந்த நிலையில், இந்த தொடரில் நேற்று (டிச.6) நடைபெற்ற முதல் லீக்ஆட்டத்தில் தமிழ் தலைவாஸ் - குஜராத் ஜெயண்ட்ஸ் அணிகள் மோதின. இந்த போட்டியில் தொடக்கம் முதலே ஆதிக்கம் செலுத்திய தமிழ் தலைவாஸ் அணி புள்ளிகளை வாரி குவித்தது.

இறுதியில் 40-27 என்ற புள்ளிக்கணக்கில் குஜராத் ஜெயண்ட்ஸை வீழ்த்தி தமிழ் தலைவாஸ் அபார வெற்றி பெற்றது. தொடர் தோல்விகளை சந்தித்து வந்த தமிழ் தலைவாஸ் அணி வெற்றி பெற்றது ரசிகர்கள் மத்தியில் மகிழ்ச்சியளித்தது. தொடர்ந்து, நடைபெற்ற 2வது லீக் ஆட்டத்தில் ஹரியானா ஸ்டீலர்ஸ் - பாட்னா பைரைட்ஸ் அணிகள் மோதிக்கொண்டன. விறுவிறுப்பாக நடைபெற்ற இந்த ஆட்டத்தில் 42 - 36 என்ற புள்ளிக்கணக்கில் பாட்னா பைரைட்ஸ் வீழ்த்தை ஹரியானா ஸ்டீலர்ஸ் அணி வென்றது.