#ProKabaddiLeague | புனேரி பால்டன், பெங்களூரு புல்ஸ் அணிகள் வெற்றி!

புரோ கபடி லீக் போட்டியின் நேற்றைய ஆட்டத்தில் புனேரி பால்டன், பெங்களூரு புல்ஸ் அணிகள் வெற்றி பெற்றன.

11-வது புரோ கபடி லீக் போட்டி ஐதராபாத்தில் கடந்த 18ம் தேதி தொடங்கியது. இதில் பங்கேற்றுள்ள 12 அணிகள் தங்களுக்குள் தலா 2 முறை மோத வேண்டும். லீக் சுற்று முடிவில் முதல் 6 இடங்களை பிடிக்கும் அணிகள் ‘பிளே-ஆப்’ சுற்றுக்கு தகுதி பெறும். லீக்கில் ‘டாப்-2’ இடங்களை வசப்படுத்தும் அணிகள் நேரடியாக அரையிறுதிக்குள் அடியெடுத்து வைக்கும். 3 முதல் 6 இடங்களை பெறும் அணிகள் வெளியேற்றுதல் சுற்றில் மோதி அதில் வெற்றி பெறும் 2 அணிகள் அரையிறுதிக்கு தகுதி பெறும்.

இந்த தொடரில் நேற்று (நவ.4) நடைபெற்ற முதல் லீக் ஆட்டத்தில் புனேரி பால்டன் – குஜராத் ஜெயண்ட்ஸ் அணிகள் மோதுக்கொண்டன. இந்த போட்டியில் ஆரம்பம் முதலே அபாரமான ஆட்டத்தை வெளிப்படுத்திய புனேரி பால்டன் 49-30 என்ற புள்ளிக்கணக்கில் குஜராத்தை வீழ்த்தி வெற்றி பெற்றது. இதனையடுத்து, 9 மணிக்கு நடைபெற்ற 2வது லீக் ஆட்டத்தில் தமிழ் தலைவாஸ் - பெங்களூரு புல்ஸ் அணிகள் மோதின.

இரு அணிகளும் விறுவிறுப்பாக ஆடி புள்ளிகளை சேர்த்தன. இதனால் தொடக்கம் முதலே போட்டி பரபரப்பாக காணப்பட்டது. இறுதியில், 36-32 என்ற புள்ளிக்கணக்கில் தமிழ் தலைவாஸை வீழ்த்தி பெங்களூரு புல்ஸ் அணி 2வது வெற்றியை பதிவு செய்தது. இன்று நடைபெறும் முதல் லீக் ஆட்டத்தில் ஜெய்ப்பூர் பிங்க் பேந்தர்ஸ் - யுபி யோத்தா அணிகள் மோதுகின்றன. 2வது ஆட்டத்தில் யு மும்பா - தபாங் டெல்லி அணிகள் பலபரீட்சை நடத்த உள்ளன.