#ProKabaddiLeague | தமிழ் தலைவாஸ் அணியை வீழ்த்தி பாட்னா பைரட்ஸ் அபார வெற்றி!

புரோ கபடி லீக் போட்டியின் நேற்றைய ஆட்டத்தில் தமிழ் தலைவாஸை வீழ்த்தி பாட்னா பைரட்ஸ் அணி வெற்றி பெற்றது.

11-வது புரோ கபடி லீக் போட்டி ஐதராபாத்தில் கடந்த 18ம் தேதி தொடங்கியது. இதில் பங்கேற்றுள்ள 12 அணிகள் தங்களுக்குள் தலா 2 முறை மோத வேண்டும். லீக் சுற்று முடிவில் முதல் 6 இடங்களை பிடிக்கும் அணிகள் ‘பிளே-ஆப்’ சுற்றுக்கு தகுதி பெறும். லீக்கில் ‘டாப்-2’ இடங்களை வசப்படுத்தும் அணிகள் நேரடியாக அரையிறுதிக்குள் அடியெடுத்து வைக்கும். 3 முதல் 6 இடங்களை பெறும் அணிகள் வெளியேற்றுதல் சுற்றில் மோதி அதில் வெற்றி பெறும் 2 அணிகள் அரையிறுதிக்கு தகுதி பெறும்.

இந்த நிலையில், இந்த தொடரில் நேற்று நடைபெற்ற 15-வது லீக் ஆட்டத்தில் முன்னாள் சாம்பியனான பாட்னா பைரட்ஸ் - தமிழ் தலைவாஸ் அணிகள் மோதிக்கொண்டன. இதில் தமிழ் தலைவாஸ் அணி ஆரம்பத்தில் சிறப்பாக ஆடி 18-7 என்ற புள்ளிகளை எடுத்து முன்னிலை பெற்றது. ஆனால், பின்னர் பாட்னா பைரைட்ஸ் அணி நிலைத்து ஆடி 18-23 என்ற பாயிண்ட் எடுத்து தமிழ் தலைவாஸ் அணியை நெருங்கியது.

தொடர்ந்து, பாட்னா வீரர் தேவாங்க் ரைடில் சிறப்பாக ஆடி, அதாவத 2 முறை 4 புள்ளிகள் எடுத்து அணியை வெற்றி பாதைக்கு கொண்டு சென்றார். முடிவில் பாட்னா அணி 42-40 என்ற புள்ளி கணக்கில் தமிழ் தலைவாசை வீழ்த்தி முதலாவது வெற்றியை பெற்றது. பாட்னா அணியின் தேவாங்க் அதிகபட்சமாக 25 புள்ளிகள் குவித்தார். தலைவாஸ் அணியில் நரேந்தர் அதிகபட்சமாக 15 புள்ளிகள் எடுத்தார். 3-வது ஆட்டத்தில் ஆடிய தலைவாஸ் அணி சந்தித்த முதல் தோல்வி இதுவாகும்.

மற்றொரு ஆட்டத்தில் புனேரி பால்டன் - பெங்களூரு புல்ஸ் அணிகள் மோதின. இதில் 36-22 என்ற புள்ளி கணக்கில் பெங்களூரு புல்சை வீழ்த்தி வெற்றி பெற்றது புனேரி பால்டன். இன்றைய ஆட்டங்களில் யு மும்பா- பெங்கால் வாரியர்ஸ் (இரவு 8 மணி), தெலுங்கு டைட்டன்ஸ்- தபாங் டெல்லி (இரவு 9 மணி) அணிகள் மோதுகின்றன.