#ProKabaddiLeague | ஜெய்ப்பூர் பிங்க் பாந்தர்ஸ் -  யு.பி.யோத்தாஸ் அணிகள் இன்று மோதல்!

புரோ கபடி லீக் போட்டியின் இன்றைய ஆட்டத்தில் ஜெய்ப்பூர் பிங்க் பாந்தர்ஸ் - யு.பி.யோத்தாஸ், யு மும்பா - தபாங் டெல்லி அணிகள் மோதுகின்றன.

11-வது புரோ கபடி லீக் போட்டி ஐதராபாத்தில் கடந்த 18ம் தேதி தொடங்கியது. இதில் பங்கேற்றுள்ள 12 அணிகள் தங்களுக்குள் தலா 2 முறை மோத வேண்டும். லீக் சுற்று முடிவில் முதல் 6 இடங்களை பிடிக்கும் அணிகள் ‘பிளே-ஆப்’ சுற்றுக்கு தகுதி பெறும். லீக்கில் ‘டாப்-2’ இடங்களை வசப்படுத்தும் அணிகள் நேரடியாக அரையிறுதிக்குள் அடியெடுத்து வைக்கும். 3 முதல் 6 இடங்களை பெறும் அணிகள் வெளியேற்றுதல் சுற்றில் மோதி அதில் வெற்றி பெறும் 2 அணிகள் அரையிறுதிக்கு தகுதி பெறும்.

இந்த நிலையில், இன்று (நவ.5) நடைபெறும் முதல் லீக் ஆட்டத்தில் ஜெய்ப்பூர் பிங்க் பாந்தர்ஸ் - யு.பி.யோத்தாஸ் அணிகள் மோதுகின்றன. யு.பி. யோத்தாஸ் அணி இதுவரை ஆடிய 6 ஆட்டங்களில் மூன்றில் வெற்றி பெற்று பாயிண்ட்ஸ் டேபிளில் 3வது இடத்தில் உள்ளது. ஜெய்ப்பூர் பிங்க் பாந்தர்ஸ் அணி 5 போட்டிகளில் விளையாடிய நிலையில், இரண்டில் வெற்றி பெற்று பாயிண்ட்ஸ் டேபிளில் 8வது இடத்தில் உள்ளது. இந்த அணிகளுக்கு இடையிலான போட்டி இன்று இரவு 8 மணிக்கு தொடங்குகிறது.

இதனையடுத்து, இரவு 9 மணிக்கு நடைபெறும் ஆட்டத்தில் பாயிண்ட் டேபிளில் 9வது இடத்தில் உள்ள யு மும்பா அணியும், 10வது இடத்தில் உள்ள தபாங் டெல்லி அணியும் மோத உள்ளன. ஒவ்வொரு அணியும் அதிக புள்ளிகளை பெற்று பாயிண்ட் டேபிளில் முன்னேறும் முனைப்பில் ஆடும். இதனால் இந்த ஆட்டங்களில் பரபரப்புக்கு பஞ்சமிருக்காது.