பிரதமர் நரேந்திர மோடி சென்னை வந்தடைந்தார்! பாஜகவினர் உற்சாக வரவேற்பு!

கேலோ இந்தியா விளையாட்டு போட்டியை தொடங்கி வைக்க பிரதமர் நரேந்திர மோடி சென்னை வந்தடைந்தார்.

மத்திய அரசு திட்டத்தின் கீழ் கேலோ இந்தியா விளையாட்டு போட்டிகள் கடந்த 2018ம்
ஆண்டு முதல் நடத்தப்பட்டு வருகிறது.  இந்தியாவில் பல்வேறு மாநிலங்களில்
நடத்தப்பட்ட இந்த போட்டியானது,  இந்தாண்டு தமிழ்நாட்டில் நடைபெற உள்ளது.  தமிழ்நாடு அரசு மற்றும் விளையாட்டு மேம்பாட்டு ஆணையம் சார்பில் 2024-ஆம் ஆண்டுக்கான கேலோ இந்தியா விளையாட்டு போட்டிகள் நடைபெற உள்ளன.

சென்னை,  கோவை,  மதுரை,  திருச்சி ஆகிய 4 மாவட்டங்களில் இந்த விளையாட்டு போட்டிகள் நடைபெற உள்ளது. 18 வயதுக்குட்பட்டவர்கள் பிரிவில் நடத்தப்படும் இந்த கேலோ இந்தியா விளையாட்டு போட்டிகள் இன்று முதல் ஜனவரி 31 வரை நடைபெற உள்ளது. கேலோ இந்தியா போட்டிகளில் 36 மாநிலங்கள் மற்றும் யூனியன் பிரதேசங்களை சேர்ந்த சுமார் 5,500க்கு மேற்பட்ட விளையாட்டு வீரர், வீராங்கனைகள் பங்கேற்கின்றனர்.

மொத்தம் 27 வகையான பிரிவில் போட்டிகள் நடத்தப்படுகிறது. இந்நிலையில், தமிழ்நாடு விளையாட்டுத்துறை அமைச்சர் உதயநிதி ஸ்டாலின் கடந்த ஜன.4-ம் தேதி டெல்லியில் பிரதமர் நரேந்திர மோடியை நேரில் சந்தித்து கேலோ இந்தியா விளையாட்டு போட்டிக்கான அழைப்பிதழை வழங்கினார்.

இந்நிலையில், கேலோ இந்தியா விளையாட்டு போட்டிகளை தொடங்கி வைக்க பிரதமர் மோடி விமானம் வாயிலாக சென்னை வந்தடைந்தார். பின்னர் சென்னை விமான நிலையத்தில் இருந்து அடையாறு ஐஎன்எஸ் பகுதிக்கு ஹெலிகாப்டர் மூலமாக செல்கிறார். அங்கிருந்து சாலை மார்க்கமாக நிகழ்ச்சி நடைபெறும் இடத்திற்கு செல்கிறார். இந்நிலையில், சிவானந்த சாலையில் பாஜகவினர் பிரதமரை வரவேற்பதற்காக பல்வேறு ஏற்பாடுகளை செய்துள்ளனர். அயோத்தி ராமர் கோயிலைப் போன்று வடிவமைப்பையும் ராமர் சிலையும் அமைத்து குழந்தைகள் வரவேற்கும் வகையில் ஏற்பாடுகள் செய்யப்பட்டுள்ளன. மேலும், மயிலாட்டம், ஒயிலாட்டம், குழந்தைகளின் பரதநாட்டியம், செண்ட மேளம், நாதஸ்வரம் என பிரதமர் மோடியை உற்சாகமாக வரவேற்க பாஜகவினர் பல்வேறு ஏற்பாடுகளை செய்துள்ளனர்.