கொச்சி வந்தடைந்த பிரதமர் மோடி - கேரள முதலமைச்சர் பினராயி விஜயன் வரவேற்பு!

ஆந்திர பிரதேசத்தில் இருந்து விமானம் மூலம் கொச்சி விமான நிலையம் வந்தடைந்த பிரதமர் நரேந்திர மோடியை அம்மாநில முதலமைச்சர் பினராயி விஜயன், ஆளுநர் ஆரிஃப் முகமது கான் ஆகியோர் வரவேற்றனர்.

பிரதமர் நரேந்திர மோடி 2 நாள் பயணமாக இன்று (ஜன. 16) ஆந்திரா மற்றும் கேரளாவுக்கு செல்ல உள்ளதாக தனது ட்விட்டர் (எக்ஸ்) பக்கத்தில் பதிவிட்டுள்ளார். பிரதமர் நரேந்திர மோடி இன்று காலை ஆந்திரா சென்றார். மேலும் அங்குள்ள அனந்தபூர் மாவட்டம்,லேபாக்ஷியில் உள்ள வீரபத்ரா கோயிலில் பிரதமர் மோடி பிரார்த்தனை செய்தார். அதுமட்டுமின்றி தெலுங்கில் உள்ள ரங்கநாத ராமாயணத்தின் வசனங்களை கேட்டார்.

அதனைத் தொடர்ந்து வீரபத்ரா கோயிலில் பிரதமர் நரேந்திர மோடி ‘ஸ்ரீ ராம் ஜெய் ராம்’ பஜனை பாடினார். அயோத்தி ராமர் கோயிலின் பிரம்மாண்ட கும்பாபிஷேக விழா நடைபெற இன்னும் 6 நாட்கள் உள்ள நிலையில், ராமாயணத்தில் சிறப்பு வாய்ந்த லெபாக்ஷிக்கு மோடி சென்றுள்ளது குறிப்பிடத்தக்கது. சீதா தேவியை கடத்திச் சென்ற ராவணனால் படுகாயமடைந்த ஜடாயு பறவை விழுந்த இடம் லேபாக்ஷி என்று கூறப்படுகிறது.

பின்னர் ஆந்திர பிரதேசத்தில் இருந்து விமானம் மூலம் கொச்சி நெடும்பாசேரி விமான நிலையம் வந்த அவர், அங்கிருந்து கார் மூலம் மகாராஜாஸ் கல்லூரி மைதானத்தில் இருந்து விருந்தினர் மாளிகை வரை 1.3 கி.மீ சாலை வழியாக பேரணி நடத்தினார். விமான நிலைய ம் வந்த அவரை முதலமைச்சர் பினராய் விஜயன், ஆளுநர் ஆரிஃப் முகமது கான் ஆகியோர் வரவேற்றனர். அம்மாநிலத்தில் உள்ள குருவாயூர் ஸ்ரீ கிருஷ்ணா கோயில் மற்றும் திரிபிராயர் ஸ்ரீராம சுவாமி கோயில் ஆகிய இரண்டு முக்கிய கோயில்களுக்கு அவர் செல்ல உள்ளார். நாளை (ஜன. 17) காலை, நடிகரும், அரசியல்வாதியுமான சுரேஷ் கோபியின் மகளின் திருமண விழாவில் பிரதமர் பங்கேற்க உள்ளார்.