"முதலமைச்சரின் பாராட்டு அமரனின் பெரும் வெற்றிக்கு அறிகுறி" - நன்றி தெரிவித்த நடிகர் #KamalHaasan!

'அமரன்' படத்தை பாராட்டிய முதலமைச்சர் மு.க.ஸ்டாலினுக்கு, இப்படத்தின் தயாரிப்பாளரும் நடிகருமான கமல்ஹாசன் நன்றி தெரிவித்துள்ளார்.

ராஜ்குமார் பெரியசாமி இயக்கத்தில் சிவகார்த்திகேயன் நடித்துள்ள 'அமரன்' திரைப்படம் நேற்று (அக்.31) திரையரங்குகளில் வெளியானது. ராஜ்கமல் ஃபிலிம்ஸ் தயாரித்துள்ள இப்படத்திற்கு ஜிவி பிரகாஷ் குமார் இசையமைத்துள்ளார். மறைந்த முன்னாள் ராணுவ வீரர் மேஜர் முகுந்த் வரதராஜனின் வாழ்க்கையைத் தழுவி இப்படம் உருவாகியுள்ளது. இதில் சிவகார்த்திகேயன் மேஜர் முகுந்த் வரதராஜனாக நடித்துள்ளார். மேலும், நடிகை சாய் பல்லவி கதாநாயகியாக நடித்துள்ளார். உலகளவில் கிட்டதட்ட 900க்கும் மேற்பட்ட திரையரங்குகளில் 'அமரன்' திரைப்படம் வெளியாகினது.

இதற்கிடையே, இந்த படத்தின் சிறப்பு காட்சியை முதலமைச்சர் மு.க. ஸ்டாலின், துணை முதலமைச்சர் உதயநிதி ஸ்டாலின், அமைச்சர் தங்கம் தென்னரசு, நடிகர் சிவகார்த்திகேயன், இயக்குநர் ராஜ்குமார் பெரியசாமி, பட தயாரிப்பாளர்கள் உள்ளிட்ட பலர் பார்த்து மகிழ்ந்தனர். 'அமரன்' படத்தை பார்த்த முதலமைச்சர் மு.க. ஸ்டாலின் எக்ஸ் தளத்தில் பாராட்டினார். இந்நிலையில் தன்னுடைய அழைப்பை ஏற்று படத்தை கண்டுகளித்த முதலமைச்சர் மு.க.ஸ்டாலின் மற்றும் துணை முதலமைச்சர் உதயநிதி ஸ்டாலினுக்கு படத்தின் தயாரிப்பாளரும், நடிகருமான கமல்ஹாசன் நன்றி தெரிவித்துள்ளார்.

இது தொடர்பாக அவர் தனது எக்ஸ் தள பக்கத்தில் பதிவிட்டுள்ளதாவது,

"எங்களது அழைப்பை ஏற்று ‘அமரன்’ திரைப்படத்தைப் பார்த்து ரசித்ததோடு, படத்தையும், அதில் பங்களிப்பாற்றிய கலைஞர்களையும் மனதார பாராட்டிய முதலமைச்சர் மு.க.ஸ்டாலினுக்கும், துணை முதலமைச்சர் உதயநிதி ஸ்டாலினுக்கும் எங்களது மனமார்ந்த நன்றி. முதலமைச்சரின் பாராட்டு அமரனின் பெரும் வெற்றிக்கு அறிகுறி"

இவ்வாறு நடிகர் கமல்ஹாசன் கூறியுள்ளார்.