வெங்காயம் விலை கிடுகிடுவென உயர்வு.. கிலோ ரூ.100க்கு விற்பனை! 

சென்னை கோயம்பேடு காய்கறி சந்தையில் வரத்து குறைவால் பெரிய வெங்காயம் விலை அதிகரித்துள்ளது. 

தமிழ்நாட்டில் வடகிழக்கு பருவமழை தொடங்கிய நிலையில் கடந்த சில நாட்களாக தமிழ்நாட்டின் பல்வேறு பகுதிகளில் கனமழை முதல் மிக கனமழை பெய்து வருகிறது. இந்நிலையில்,வங்க கடல் பகுதியில் மேல் அடுக்கு சுழற்சி காரணமாக சென்னை,காஞ்சிபுரம், செங்கல்பட்டு, நாகப்பட்டினம், திருவாரூர் உள்ளிட்ட மாவட்டங்களில் மிதமான மழை முதல் கனமழை பெய்து வருகிறது.

பொதுவாகவே மழைக்காலத்தில் வெங்காயத்தின் விளைச்சல் பாதிக்கப்படும். அந்த வகையில் வெங்காய விளைச்சல் கடந்த சில மாதங்களில் தொடர்ந்து குறைந்துள்ளது. மேலும், வெங்காய ஏற்றுமதி தடை நீக்கம் போன்ற காரணங்களால் வெங்காயம் விலை கடுமையாக உயர்ந்துள்ளது.

இதையும் படியுங்கள் : காரில் கடத்திய ரூ.2 லட்சம் குட்கா போதை பொருட்கள் பறிமுதல் – 5 பேர் கைது!

இந்நிலையில், சென்னை கோயம்பேட்டில் வெங்காயத்தின் விலை ஒரு கிலோ 80 முதல் 90 ரூபாய்க்கு விற்பனையான நிலையில், இன்று அதன் விலை 100 ரூபாயை எட்டியுள்ளது. சில்லறை காய்கறி கடைகளில் ஒரு கிலோ 120 முதல் 130 ரூபாய் அளவிற்கு விற்பனை செய்யப்படுகிறது. இப்போது உச்சம் தொட்டுள்ள வெங்காயத்தின் விலையானது இன்னும் ஒரு சில வாரங்களுக்கு இப்படியே நீடிக்க வாய்ப்பு இருப்பதாக வியாபாரிகள் தெரிவித்துள்ளனர்.