ஒருநாள் கிரிக்கெட் தரவரிசை - முதலிடம் பிடித்து #Pakistan வீரர்கள் அசத்தல்!

ஒருநாள் கிரிக்கெட் போட்டிக்கான தரவரிசை பட்டியலில் பாகிஸ்தான் வீரர்கள் முதலிடம் பிடித்து அசத்தியுள்ளனர்.

பாகிஸ்தான் கிரிக்கெட் அணி ஆஸ்திரேலியாவில் சுற்றுப்பயணம் மேற்கொண்டு 3 போட்டிகள் கொண்ட ஒருநாள் தொடரில் விளையாடியது. இந்த தொடரை 2-1 என்ற கணக்கில் பாகிஸ்தான் கைப்பற்றியது. இந்த நிலையில், இந்த தொடர் நிறைவடைந்ததை அடுத்து ஆடவருக்கான ஒருநாள் கிரிக்கெட் தரவரிசை பட்டியலை சர்வதேச கிரிக்கெட் கவுன்சில் (ஐசிசி) இன்று (நவ.13) வெளியிட்டது.

அதன்படி, ஒருநாள் போட்டிக்கான பேட்ஸ்மேன் தரவரிசை பட்டியலில் பாகிஸ்தானின் பாபர் அசாம் (825 புள்ளி) முதல் இடத்திலும், இந்தியாவின் ரோகித் சர்மா (765 புள்ளி) 2-வது இடத்திலும், சுப்மன் கில் (763 புள்ளி) 3வது இடத்திலும், விராட் கோலி (746 புள்ளி) 4வது இடத்திலும் உள்ளனர். அதே போல் ஒருநாள் போட்டிக்கான பந்துவீச்சாளர்கள் தரவரிசை பட்டியலில் பாகிஸ்தானின் ஷாகின் அப்ரிடி (696 புள்ளி) 3 இடம் உயர்ந்து முதல் இடத்தை பிடித்துள்ளார்.

ஆப்கானிஸ்தானின் ரஷித் கான் (687 புள்ளி) 2வது இடத்திலும், தென் ஆப்பிரிக்காவின் கேசவ் மஹராஜ் (674 புள்ளி) 3வது இடத்திலும், இந்தியாவின் குல்தீப் யாதவ் (665 புள்ளி) 4வது இடத்திலும் உள்ளனர். மேலும், இந்தியாவின் பும்ரா 6-வது இடமும் முகமது சிராஜ் 8-வது இடமும் பிடித்துள்ளனர்.