ஷர்தூல் தாக்கூர், ரூதர்போர்டை அணியில் இணைத்த மும்பை..!

19 ஆவது ஐ.பி.எல் தொடர் அடுத்த ஆண்டு நடைபெற உள்ளது. அதனை முன்னிட்டு அடுத்த மாதம் வீரர்களுக்கான மினி ஏலம் இந்த ஆண்டு நடைபெறுகிறது. இந்த மினி ஏலத்திற்கு முன் அனைத்து அணிகளும் தங்களது அணியிலிருந்து விடுவிக்கும் மற்றும் தக்கவைக்கப்போகும் வீரர்களின் பட்டியலை வெளியிட வேண்டும். மேலும் வீரர்கள் அணிமாற்றம் செய்யும் டிரேடிங் முறையும் உண்டு. அந்த வகையில் சென்னை அணியில் இருந்து ஆல்-ரவுண்டர்கள் ரவீந்திர ஜடேஜா மற்றும் சாம் கரன் ஆகியோரை ராஜஸ்தான் அணிக்கு அளித்து அந்த அணியின் கேப்டன் சஞ்சு சாம்சனை சென்னை அணி பெற்று கொள்ள விரும்புவதாக தகவல்கள் வெளியாகியுள்ளன.

இந்நிலையில், லக்னோ அணி வீரர் ஷர்துல் தாக்கூரை மும்பை அணி டிரேடிங் முறையில் வாங்கியுள்ளது.  அதன் படி ஷர்துல் தாக்கூரை ரூ.2 கோடி கொடுத்து மும்பை அணி வாங்கியுள்ளது.

அதே போல் குஜராத் அணிக்காக கடந்த ஐபிஎல் சீசனில் விளையாடிய மேற்கிந்தியத் தீவுகள் அணியின் ஆல்ரவுண்டரான ஷெர்ஃபேன் ரூதர்ஃபோர்டை குஜராத் டைட்டன்ஸ் அணியிடம் இருந்து டிரேடிங் முறையில் மும்பை இந்தியன்ஸ் அணி வாங்கியுள்ளது. குஜராத் அணியால் ரூ.2.6 கோடிக்கு ஏலத்தில் வாங்கப்பட்ட ஷெர்ஃபேன் ரூதர்ஃபோர்டு, அதே தொகைக்கு மும்பை அணிக்கு விற்கப்பட்டுள்ளார்.