இந்தியாவில் ‘மெட்டா AI’ - வாட்ஸ்அப், ஃபேஸ்புக், இன்ஸ்டா பயனர்கள் பயன்படுத்தலாம்!

இந்தியாவில் மெட்டா நிறுவனத்தின் ஜெனரேட்டிவ் ஏஐ சாட்பாட்டான ‘மெட்டா ஏஐ’ அறிமுகம் ஆகியுள்ளது. வாட்ஸ்அப், ஃபேஸ்புக், இன்ஸ்டாகிராம், மெசெஞ்சர் போன்ற செயலிகளில் பயனர்கள் பயன்படுத்தலாம் என தெரிவிக்கப்பட்டுள்ளது.

மெட்டா நிறுவனத்தின் ஜெனரேட்டிவ் ஏஐ சாட்பாட்டான ‘மெட்டா ஏஐ’ இந்தியாவில் அறிமுகம் செய்யப்பட்டுள்ளது. இப்போதைக்கு இதனை இந்தியாவில் ஆங்கில மொழியில் மட்டுமே பயன்படுத்த முடியும். மெட்டா நிறுவன சமூக வலைதளங்கள் மட்டுமல்லாது மெட்டா ஏஐ வலைதளத்திலும் இதனை பயன்படுத்தலாம். இதனை அதன் சேர்ச் பாக்ஸில் பயனர்கள் பயன்படுத்தலாம்.

கடந்த இரண்டு மாதங்களுக்கு முன்னர் இந்த சாட்பாட்டினை சர்வதேச அளவில் மெட்டா அறிமுகம் செய்தது. இருந்தும் இதன் பாட் பயன்பாட்டை இந்தியாவில் பொதுத் தேர்தல் நடைபெற்ற காரணத்தால் தள்ளி வைத்தது குறிப்பிடத்தக்கது. கடந்த வாரம் கூகுள் நிறுவனம், அதன் Gemini சாட்பாட்டை இந்தியாவில் அறிமுகம் செய்தது. அதையடுத்து மெட்டாவும் தனது ஏஐ சாட்பாட்டை அறிமுகம் செய்துள்ளது.

மற்ற ஜெனரேஷன் ஏஐ சாட்பாட்களை போலவே இதிலும் பயனர்கள் பல்வேறு டாஸ்குகளை மேற்கொள்ளலாம். பயனர்கள் இதைக் கொண்டு மின்னஞ்சல் எழுத, கவிதை, மொழிபெயர்ப்பு, டெக்ஸ்டுகளை சுருக்கி தர, இமேஜ் மற்றும் GIF உருவாக்க என பல பணிகளை செய்யலாம். இது அனைத்தையும் பயனர்கள் வாட்ஸ்அப், ஃபேஸ்புக் பக்கத்தில் இருந்தபடி மேற்கொள்ளலாம். கூகுள், மைக்ரோசாஃப்ட் வழங்கும் நிகழ்நேர சேர்ச் ரிசல்ட்களை பயனர்கள் இதில் பெற முடியும்.

நேற்று (ஜூன் 24) முதல் இந்த ஏஐ பாட் இந்தியாவில் அறிமுகம் செய்யப்படுவதாக அறிவிப்பு வெளியாகி உள்ளது. இருந்தாலும் பெரும்பாலான பயனர்கள் தங்களது ஃபேஸ்புக், வாட்ஸ்ஆப், இன்ஸ்டாகிராம் பக்கம் மற்றும் மெட்டா ஏஐ தள பக்கத்திலும் இதனை பயன்படுத்த முடியவில்லை என தெரிவித்துள்ளனர். Meta AI is not yet available in your country என பலருக்கும் அதன் தளத்தில் காண்பித்து வருகிறது. பயனர்களுக்கு வரும் நாட்களில் படிப்படியாக இந்த ஏஐ பாட் பயன்பாட்டுக்கு கிடைக்கும் என பரிந்துரைக்கப்பட்டுள்ளது.