‘நேபாளம் - திபெத் எல்லையில் ஏற்பட்ட நிலநடுக்கத்தில் சிக்கி உயிர் பிழைத்த சிறுமி’ என வைரலாகும் பதிவு உண்மையா?

This News Fact Checked by ‘Vishvas News’

நேபாளம் - திபெத் எல்லையில் ஏற்பட்ட நிலநடுக்க இடிபாடுகளுக்குள் சிக்கி உயிர் பிழைத்ததாகக் கூறும் சிறுமியின் புகைப்படம் சமூக ஊடகங்களில் வைரலாகி வருகிறது. இதுகுறித்த உண்மை சரிபார்ப்பை காணலாம்.

நேபாளம் - திபெத் எல்லையில் ஏற்பட்ட நிலநடுக்கத்திற்குப் பிறகு, நிலநடுக்கத்தின் இடிபாடுகளுக்குள் சிக்கி உயிர் பிழைத்ததாக சிறுமியின் புகைப்படம் சமூக ஊடகங்களில் வைரலாகி வருகிறது. இதுகுறித்த உண்மை சரிபார்ப்பில், விஸ்வாஸ் நியூஸ் ஆய்வு செய்ததில் படம் AI ஆல் உருவாக்கப்பட்டது என்பது கண்டறிந்தது.

ஜனவரி 7, 2025 அன்று நேபாள - திபெத் எல்லைக்கு அருகே 7.1 ரிக்டர் அளவிலான சக்திவாய்ந்த நிலநடுக்கம் ஏற்பட்டது, குறைந்தது 95 பேர் கொல்லப்பட்டனர். 60க்கும் மேற்பட்டோர் காயமடைந்தனர். இதனால் பல கட்டிடங்கள் பலத்த சேதம் அடைந்தன, பல இடிந்து விழுந்தன. இதைத் தொடர்ந்து, இடிபாடுகளில் சிக்கிய சிறுமியின் புகைப்படம் சமூக ஊடகங்களில் பகிரப்பட்டு வருகிறது. மேலும் இந்த நிலநடுக்கத்தில் சிறுமி உயிர் பிழைத்ததாகவும் அதில் கூறப்படுகிறது.

விஸ்வாஸ் நியூஸ் தனது விசாரணையில் இது AI உருவாக்கப்பட்ட படம் என்று கண்டறிந்தது, இது பயனர்கள் அதை உண்மை என்று நினைத்து பகிர்ந்து கொள்கிறார்கள்.

வைரலான பதிவு:

ஃபேஸ்புக் பயனர் 'வைரல் சிக்கிம்' (காப்பக இணைப்பு) ஜனவரி 8 அன்று இந்தப் படத்தைப் பகிர்ந்து, “நேற்று 7ம் தேதி காலை நிலநடுக்கத்தில் 288க்கும் மேற்பட்டோர் உயிரிழந்தனர். சீனாவின் திபெத்தில் எவரெஸ்ட் சிகரத்திற்கு அருகில் 3000 க்கும் மேற்பட்ட கட்டிடங்கள் இடிந்தன. அப்போதும் கூட அந்த பயங்கர நிலநடுக்கத்தின் புகை மற்றும் குப்பைகளில் இருந்து இந்த சிறுமி உயிர் பிழைத்தாள். இடிபாடுகளின் செங்கற்களுக்குள் வாழ்க்கையின் பிரகாசமான விளக்கு எரிகிறது. இருண்ட இரவுக்குப் பிறகு சூரியன் பிரகாசிக்கத் தொடங்குவது போல, இந்த குழந்தைகள் பூகம்பத்தால் சிதைந்த நகரங்களில் நம்பிக்கையின் தாவரங்களாக மாறுவார்கள். இயற்கை அழிவை ஏற்படுத்தியது, ஆனால் இந்த பெண் எதிர்காலத்தை வென்றார்" என பதிவிட்டுள்ளார்.

உண்மை சரிபார்ப்பு:

இந்த பதிவை ஆராய, முதலில் படத்தை கவனமாகப் பார்த்ததில், சிறுமியின் ஒரு கையில் 6 விரல்கள் இருப்பதும், அவரது கண்களும் காணவில்லை. எனவே, இந்தப் படம் AI-யால் உருவாக்கப்பட்டதாக இருக்கலாம் என சந்தேகிக்கப்பட்டது.

AI படத்தைக் கண்டறியும் கருவியான Hive Moderation மூலம் இந்தப் படத்தைச் சரிபார்த்ததில், இந்தப் புகைப்படம் AI-ஆல் உருவாக்கப்படுவதற்கான 88% வாய்ப்பைக் காட்டியது.

AI படத்தைக் கண்டறியும் கருவி Sight Engine ஆனது AI-ஆல் உருவாக்கப்படுவதற்கான 89% வாய்ப்பை காட்டியது.

இந்த விஷயத்தில் AI நிபுணர் அன்ஷ் மெஹ்ராவிடம் பேசியபோது, இது AI உருவாக்கிய படம் என்று அவர் கூறினார். சிறுமியின் கைகள் மற்றும் கண்களைப் பார்த்தால் இது தெளிவாகத் தெரியும் என கூறினார்.

இந்த பதிவை பகிர்ந்த பேஸ்புக் பயனாளர், வைரல் சிக்கிம், 16,000 க்கும் மேற்பட்ட பின்தொடர்பவர்களை கொண்டுள்ளார்.

முடிவு:

நேபாள-திபெத் எல்லையில் ஏற்பட்ட நிலநடுக்கத்திற்குப் பிறகு, இடிபாடுகளுக்குள் சிக்கி உயிர் பிழைத்ததாகக் கூறி ஒரு சிறுமியின் புகைப்படம் சமூக ஊடகங்களில் வைரலானது. இருப்பினும், விஸ்வாஸ் நியூஸ் ஆய்வு செய்து, படம் AI ஆல் உருவாக்கப்பட்டது என்பதைக் கண்டறிந்தது.

Note : This story was originally published by ‘Vishvas News’ and Translated by ‘News7 Tamil’ as part of the Shakti Collective.