IPL 2024 – விருது மற்றும் பரிசுத்தொகை வென்றவர்கள் பட்டியல்!
ஐபிஎல் 2024 இறுதிப் போட்டியில் வெற்றி பெற்ற கொல்கத்தா நைட் ரைடர்ஸ் அணிக்கு ரூ.20 கோடிக்கான காசோலையும், ஐபிஎல் டிராபியும் வழங்கப்பட்டது.
ஐபிஎல்2024 மார்ச் 22ம் தேதி தொடங்கி தற்போது இறுதி கட்டத்தை எட்டியுள்ளது. மொத்தமாக 10 அணிகள் பங்கேற்ற இத்தொடரில், நடப்பு சாம்பியன்ஸான சென்னை சூப்பர் கிங்ஸ் அணி ப்ளே ஆஃப் சுற்றுக்கு தகுதி பெறாமலேயே வெளியேறியது. இது ரசிகர்களிடையே பெரும் கவலையை ஏற்படுத்தியது.
இதைத்தொடர்ந்து கொல்கத்தா நைட் ரைடர்ஸ், சன்ரைசர்ஸ் ஹைதராபாத், ராஜஸ்தான் ராயல்ஸ் மற்றும் ராயல் சேலஞ்சர்ஸ் பெங்களூரு என 4 அணிகள் பிளே ஆஃப் சுற்றுக்கு வந்தன. இதில், ராயல் சேலஞ்சர்ஸ் பெங்களூரு எலிமினேட்டரில் வெளியேற, ராஜஸ்தான் ராயல்ஸ் 2ஆவது குவாலிஃபையர் சுற்றில் வெளியேறியது. கடைசியாக கொல்கத்தா நைட் ரைடர்ஸ் மற்றும் சன்ரைசர்ஸ் ஹைதராபாத் அணிகள் இறுதிப் போட்டிக்கு வந்தன.
இந்நிலையில், இறுதிப்போட்டி சென்னை சேப்பாக்கத்தில் உள்ள சிதம்பரம் மைதானத்தில் நடைபெற்றது. இதில் கொல்கத்தா நைட் ரைடர்ஸ் அணியும், சன்ரைசர்ஸ் ஹைதராபாத் அணியும் மோதின. இதில், முதலில் விளையாடிய சன்ரைசர்ஸ் ஹைதராபாத் 18.3 ஓவர்களில் அனைத்து விக்கெட்டுகளையும் இழந்து 113 ரன்கள் மட்டுமே எடுத்தது. அதிகபட்சமாக கேப்டன் பேட் கம்மின்ஸ் 24 ரன்கள் எடுத்தார்.
கொல்கத்தா நைட் ரைடர்ஸ் அணியைப் பொறுத்த வரையில் பவுலிங்கில் ஆண்ட்ரே ரஸல் 3 விக்கெட்டுகள் எடுத்தார். மிட்செல் ஸ்டார்க் மற்றும் ஹர்ஷித் ராணா தலா 2 விக்கெட்டுகள் எடுத்தனர். வைபவ் அரோரா, சுனில் நரைன் மற்றும் வருண் சக்கரவர்த்தி ஆகியோர் தலா ஒரு விக்கெட்டுகள் எடுத்தனர்.
இலக்கை துரத்திய கொல்கத்தா நைட் ரைடர்ஸ் அணியில் சுனில் நரைன் 6 ரன்களில் ஆட்டமிழந்தார். குர்பாஸ் அகமது மற்றும் வெங்கடேஷ் ஐயர் இருவரும் இணைந்து வெற்றியின் விளிம்பு வரை சென்றது. அப்போது குர்பாஸ் 39 ரன்களில் ஆட்டமிழந்தார். கடைசியாக ஷ்ரேயாஸ் ஐயர் 6 ரன்களும், வெங்கடேஷ் ஐயர் 52 ரன்களும் எடுக்கவே கொல்கத்தா நைட் ரைடர்ஸ் 10.3 ஓவர்களில் 2 விக்கெட்டுகளை இழந்து 8 விக்கெட்டுகள் வித்தியாசத்தில் வெற்றி பெற்று 3வது முறையாக சாம்பியன் ஆனது.
இதைத் தொடர்ந்து பரிசளிப்பு நிகழ்ச்சி நடைபெற்றது. இதில், வளர்ந்து வரும் வீரருக்கான விருது, ஃபேர்பிளே விருது, பர்பிள் கேப், ஆரஞ்சு கேப், மிகவும் மதிப்புமிக்க வீரர் விருது, 2-ம் இடம் பிடித்த ஹைதராபாத் அணிக்கு விருதுகளும், பரிசு தொகையும் வழங்கப்பட்டதைத் தொடர்ந்து கடைசியாக சாம்பியனான கொல்கத்தா நைட் ரைடர்ஸ் அணிக்கு ரூ.20 கோடிக்கான காசோலையும், ஐபிஎல் டிராபியும் வழங்கப்பட்டது.
ஷ்ரேயாஸ் ஐயர் முதல் முறையாக ஐபிஎல் 2024 டிராபியை தனது கையால் தூக்கினார். பிசிசிஐ செயலாளர் ஜெய் ஷா மற்றும் தலைவர் ரோஜர் பின்னி இருவரும் இணைந்து ஐபிஎல் டிராபியை வழங்கினர்.
ஐபிஎல் 2024 விருது, பரிசுத் தொகை வென்றவர்களின் முழு விவரம்:
எமர்ஜிங் பிளேயர் ஆஃப் தி சீசன் – நிதிஷ் குமார் ரெட்டி – ரூ.10 லட்சம்
ஃபேர்பிளே விருது – சன்ரைசர்ஸ் ஹைதராபாத்
பர்பிள் கேப் வின்னர் – ஹர்ஷல் படேல் (24 விக்கெட்டுகள்) – புவனேஷ்வர் குமார் பெற்றுக் கொண்டார். ரூ.10 லட்சம் வழங்கப்பட்டது.
ஆரஞ்சு கேப் – விராட் கோலி (741 ரன்கள், ரூ.10 லட்சம்) – ஷ்ரேயாஸ் ஐயர் பெற்றுக் கொண்டார்.
மதிப்புமிக்க வீரர் – சுனில் நரைன் (488 ரன்கள் மற்றும் 17 விக்கெட்டுகள்), ரூ.10 லட்சம்
பிட்ச் மற்றும் கிரவுண்ட் விருது – ஹைதராபாத் கிரிக்கெட் சங்கம் – ரூ.50 லட்சம்
ஐபிஎல் 2024 2வது இடம் – சன்ரைசர்ஸ் ஹைதராபாத் – ரூ.12.5 கோடி வழங்கப்பட்டது. பேட் கம்மின்ஸ் ரூ.12.5 கோடிக்கான காசோலையை பெற்றுக் கொண்டார்.
ஐபிஎல் 2024 சாம்பியன் – கொல்கத்தா நைட் ரைடர்ஸ் – ஷ்ரேயாஸ் ஐயர் வெற்றி பெற்றதற்கான ரூ.20 கோடிக்கான காசோலையை பெற்றுக் கொண்டார். ஐபிஎல் டிராபியும் வழங்கப்பட்டது.
